A VDE Ourense dá un golpe sobre a mesa e imponse na casa do líder (0-1)

E xa van sete sen perder. A VDE Ourense segue florecendo na Segunda Federación e esta vez incluso obrigou a dobrar o xeonllo a un Real Oviedo Vetusta que era o último invicto no torneo, ademais de ostentar credenciais de líder. Os de vermello callaron unha grande actuación en todas as facetas do xogo e venceron con personalidade: 0-1.

A formación aliñada por Borja Fernández plantouse sen complexos no céspede do Requexón e discutiulle a posesión a un filial que o intentou primeiro, cun chute de Coballes fóra, e incomodou coa súa presión alta. Máis preto de marcar estiveron os de casa no único descoido visitante, tras presión do ariete Joaquín, que selou Enzo cun disparo que rematou co coiro na base do poste.

Ata ese momento, só Champi e De Prado eran capaces de asociarse para profundar, pero cada vez eran máis constantes os toques dos forasteiros na medular, con Parrilla como auténtico mariscal de campo e Viti como escudeiro fiable. O citado seis engatilló desde o balcón da área e Miguel Narváez voou para evitar o gol, que non tardou moito. Nunha recuperación adiantada, incorporouse Samu Pardo ao ataque e cedeu a Santi De Prado, que tras unha brillante manobra enviou o coiro á gaiola. O seu mozo inimigo acusou o golpe e chegou sen reaccionar ao intermedio.

Outro cantar foi o do segundo período. A VDE Ourense colgou o chaqué no vestiario e regresou co mono de faena, nada máis ver aos carbayones co coitelo entre os dentes. O primeiro aviso de Coballes obrigou a Manu Vizoso a empregarse a fondo para desviar un balón que Dieguito enviou á rede, en fóra de xogo. O experimentado Roberto Aguirre non tardou sumar adrenalina aos seus coa entrada de Omar Falah, Castri e Guille Berzal, dándolle un ton máis ofensivo ao seu once.

Enzo estivo a piques de atopar portería nun chute que escapou por amais do traveseiro e o seu goleador Joaquín non enganchou ben un bo servizo desde a esquerda. Os asturianos apertaban e os ourensanistas entregábanse a un exercicio defensivo, no que foron sumando de modo paulatino as entradas de Varo, Pol Bueso e Labrada. De feito, os visitantes conseguían que Vizoso pasase por escasos apuros, aínda que tivo que responder con acerto ante Dieguito e ver como un envío envelenado de Berzal remataba na madeira. Tres puntazos.

---

---

---