Os equipos de extinción aproveitan o alivio da calor para gañar terreo ao lume
OURENSE
Os medios concentran máis esforzos no monte tras moitos días pendentes de defender os pobos. O vento reaviva algúns focos e complica a extinción na comarca lucense de Quiroga. Un novo lume na Merca obriga a cortar a AG-31 a Celanova
21 ago 2025 . Actualizado á 11:22 h.A segunda xornada de baixada de temperaturas e aumento da humidade do aire inclinou a balanza cara ao lado de quen loita contra o lume nos focos que seguen activos na provincia de Ourense. A sensación é que a virulencia das chamas e o avance das frontes é máis contido, pero as hectáreas queimadas seguen crecendo. No último balance da Xunta había 14.200 hectáreas máis que no reconto da mañá. A xornada do mércores comezou con boas noticias, como a continuación da conexión ferroviaria coa meseta pola liña de Zamora, a extinción definitiva do de San Cibrao das Viñas e do orixinado na parroquia de Vilar de Cervos, no municipio de Vilardevós. Con todo, neste municipio o vento reactivou algúns focos. Non foi a única localidade na que os veciños viron como volvían xurdir as chamas en zonas polas que xa pasara o incendio.
A iso hai que sumar a aparición dun novo lume na Merca, que obrigou a cortar a AG-31 que conecta Ourense e a autovía A-52 con Celanova. Esta é unha das poucas comarcas que esquivaran a praga de incendios deste agosto na provincia ourensá. Outro das frontes activas que preocupa é o que saltou á zona de Quiroga desde Valdeorras e que, ademais dos problemas que está a xerar en varias localidades do territorio lucense, volve ter en albas aos veciños do municipio ourensán de San Xoán de Río, que levan dúas semanas cercados polos focos que avanzan desde outros concellos.
Ese lume acumula xa 30.000 hectáreas. Outro dos que preocupa é o que afecta á montaña de Trevinca, no municipio de Carballeda de Valdeorras, que que entrou desde León xa consumiu 2.600. Ademais destes dous, a última hora do mércores tamén seguían activos os de Chandrexa de Queixa e Vilariño de Conso, que se converteron nun que ata o de agora queimou 19.000; a fronte que suman os de Oímbra e Xinzo (17.000); o da Mezquita (10.000) e o que formaron ao unirse os lumes que arrincaron en Carballeda de Avia e Beade (4.000).
O incendio de Vilardevós que naceu na parroquia de Moilalde pasou a engrosar a listaxe dos estabilizados con 600 hectáreas afectadas. Nesa situación están outros dous lumes dese mesmo concello: o que se orixinou en Vilar de Cervos, ao que se lle asignan 900 hectáreas de monte queimado e o de Fumaces (100). Tamén teñen esa consideración os de Maceda (3.500), Montederramo (120) e Riós (20); e mantéñense controlados o do Saviñao e Agolada, con 60 e 400 hectáreas queimadas, respectivamente.