O equipo está pendente de reforzarse tras asegurar a renovación do técnico Borja Fernández
29 may 2025 . Actualizado á 05:00 h.Coa renovación do adestrador Borja Fernández atada desde hai xa días, a VDE Ourense perfila o persoal para a estrea na Segunda Federación. O proceso electoral aberto non impide que a xunta xestora do club traballe ás alancadas nos despachos para crear un persoal competitivo neste salto de categoría. Á espera de que se oficialicen as primeiras fichaxes, no día a día da VDE Ourense xa se fixeron públicas algunhas saídas. Os dous primeiros xogadores en pechar a etapa no Couto a través das súas redes sociais, foron Luismi e Gastón.
O primeiro deles tivo unha notable participación no ascenso do equipo, tendo en conta que seus foron goles decisivos nos partidos ante Vilalbés e Silva na recta final da tempada. Luismi pecha desta forma unha etapa de dúas campañas tras chegar a Ourense desde o Coruxo vigués. Tamén vestiu a camiseta do desaparecido CD Ourense. Tampouco continuará a próxima tempada o dianteiro arxentino Gastón Cellerino tras unha campaña na que anotou oito goles.