A mascarada ibérica, que cumpre dez anos, celébrase esta fin de semana en Viana do Bolo e Vilariño de Conso
13 may 2025 . Actualizado á 05:00 h.Case medio centenar de entroidos daranse cita esta fin de semana na mascarada ibérica. ViboMask celebra a súa décima edición e faio con novidades, xa que xunto a grupos habituais que non fallan un só ano únense nesta ocasión ata once novos. «Carabeos de Cantabria, Zaulduondo do País Vasco, tres entroidos de Zamora e 4 de Ávila, ademais dos Currumiños de Mos e os Farrangalheiros de Melgaço, en Portugal son os novos este ano», explicou Jorge Domínguez, Minas. Acudiu á presentación en nome das asociacións Fulións Rurais de Viana e Robreda, que son as organizadoras da mascarada. Un evento ao que dedican moitas horas de xeito altruísta e que quixo pór en valor o director de Turismo de Galicia, Xosé Manuel Merelles. A iniciativa privada co apoio institucional permite dar lugar a propostas como ViboMask, unha cita de exaltación do entroido, «unha das manifestacións culturais que ten máis futuro», destacou Merelles.
Na presentación estiveron tamén o vicepresidente da Deputación, Rosendo Fernández; o delegado da Xunta en Ourense, Manuel Pardo; a alcaldesa de Vilariño de Conso, Melisa Macía; e o edil de Cultura de Viana, Marcos Martínez.
Fulións, boteiros, mázcaras, pantallas, peliqueiros, felos, bonitas... Ata unha vintena de entroidos ourensáns estarán na mascarada, na que haberá presenza das catro provincias galegas, así como de Asturias, Cantabria, Castela e León, Castela A Mancha, Estremadura e País Vasco. Desde Portugal chegarán catro entroidos, dous da zona de Bragança, un de Viana do Castelo e outro de Viseu.
Todos eles participarán nos multitudinarios e vistosos desfiles que se celebrarán a fin de semana. En Viana a cita será o sábado a partir das cinco da tarde. Sairán da rotonda do boteiro para rematar na praza Maior. Ao día seguinte trasladaranse a Vilariño para participar nun percorrido que comezará ás 11.30 horas na praza e rematará xunto ao colexio.
Un mercadillo de artesanía por partida dobre e un festival de música tradicional
Nas últimas edicións ViboMask inclúe tamén un mercadillo de artesanía no que produtores da zona expoñen e venden desde queixo ou aceite a artigos de coiro ou madeira, entre outras moitas propostas. O sábado pola mañá abrirá o mercado en Viana, mentres que o domingo a cita trasládase a Vilariño de Conso. Neste concello, o 18 pola tarde celebrarase a cuarta edición do Festival de Música Tradicional e Popular. Con el conmemórase o Día das Letras Galegas.
Ás catro haberá unha sesión de bailables no pavillón coa Banda de Música e Cultura de Galicia. Ás cinco comezarán as actuacións da agrupación de música tradicional de Vilariño, as cantareiras Alalás, Ou Son do Vento, Cantagalos, Zoadeira e Cuncas do Son. Pechará a xornada o grupo de batucada da Banda de Música e Cultura de Galicia. Todo con entrada gratuíta.
Conferencias no instituto que poderán seguirse a través de internet
ViboMask é moito máis que un desfile. Desde a organización apostan por involucrar á sociedade na promoción e conservación do entroido e por iso o programa inclúe tamén conferencias no instituto. Serán o venres pola mañá. Á once, o etnógrafo José Rodríguez Cruz fará un Percorrido por algúns entroidos arrainos. Ás doce será a quenda do fotógrafo Carlos González, coa charla A máscara, ponte entre dúas culturas (de España a México). Á unha será a presentación dA Vijanera, de Silió (Cantabria), a cargo de César Rodríguez. Todas as conferencias poderán seguirse en directo a través das redes sociais (Facebook e Instagram) da revista dixital Ou Choupín, do IES Carlos Casares.
Ademais, ás 18.30 horas na sala de exposicións do consistorio inaugurarase a mostra 10 anos dan para moito: ViboMask en imaxes. A entrada é libre.