A Fiscalía de Ourense acusa a un home de orixe senegalesa de organizar o engano
25 abr 2025 . Actualizado á 05:00 h.O 3 de agosto do 2022 unha muller, veciña de Ourense, recibiu no seu móbil unha mensaxe de WhatsApp inquietante. Alguén que se identificou como a súa filla lle aseguraba que perdera o móbil e pedíalle 1.926 euros para poder realizar xestións no lugar no que se atopaba. Aseguráballe que era moi urxente e que necesitaba a súa axuda, e a destinataria picou. Naqueles momentos a súa filla atopábase lonxe de casa e non puido comprobar con ela se o que lle pedían era certo, así que decidiu enviar o diñeiro por transferencia. Pronto descubriu que todo fora unha estafa pero o seu banco non quixo saber nada e non lle quedou máis camiño que acudir á vía xudicial.
Tras a súa denuncia, a Policía Nacional seguiu o rastro do diñeiro. Descubriron que fora ingresado nunha conta da que era titular un home de orixe senegalesa, que foi denunciado. Agora a Fiscalía de Ourense atribúelle un delito de estafa polo que pide dous anos de prisión e a devolución do diñeiro. O xuízo suspendeuse este xoves pola enfermidade dun dos avogados.