O exalcalde de Melón, denunciado por dicir «peixeira de merda, vaite lavar que cheiras» a unha concelleira do goberno socialista

O PSOE informou de que a concelleira do equipo de goberno de Melón Fátima Barreiro presentou unha denuncia na Garda Civil do Carballiño contra o edil e exalcalde do PP Alberto Pardellas por inxurias, insultos e vexacións. Os socialistas explicaron que o popular chamou «bobo do cu» ao alcalde e dirixiuse a Barreiro dicíndolle «peixeira de merda, vaite lavar que cheiras». Aseguran que incluso se encararon e botoulle unha botella de auga por amais. Pardellas, pola súa banda, declarou que a el tamén o insultaron e que a querela non lle supón ningún problema.

A confrontación que rematou en denuncia produciuse despois do pleno municipal celebrado o pasado 26 de marzo. Segundo o PSOE, ao rematar a sesión, Alberto Pardellas empezou a insultar ao alcalde socialista, Emilio Luis Díaz, e á secretaria «dirixíndose a eles con cualificativos tales como tonto, que eres tonto del culo». Despois, relatan, o edil enfrontouse a Fátima Barreiro, a concelleira de servizos sociais. «Dirixiuse a ela entre berros nos termos de esta "peixeira de merda, vaite lavar que cheiras. Vai pagar o que debes a Barbadás. Teño os papeis na casa, tonta subnormal"». Aseguran que incluso se chegou a encarar con ela «a escasos centímetros», botándolle unha botella de auga por amais. 

Ante a «actitude agresiva» de Pardellas e temendo un posible ataque, a edila foi á Garda Civil para presentar unha querela. «Xa houbo varios altercados con outros compañeiros e temo que a situación poida ir amáis, chegando incluso a agresión», declarou. O rexedor, Emilio Luís Díaz, considera que o comportamento do popular é inadmisible e reclama ao presidente do PP, Alfonso Rueda, e ao responsable provincial, Luis Menor, que «poñan coto de inmediato a estas actitudes antidemocráticas e vexatorias». 

Alberto Pardellas non nega os insultos de «bobo do cu» e relata que lle dixo a Fátima Barreiro que «cheiraba a peixe» xa que traballa como peixeira. Pero engade que integrantes do grupo de goberno tamén o insultaron a el chamándolle «portugués de merda» e «don ninguén». Asegura que a concelleira socialista encaróuselle e que foi un membro do goberno quen lle dixo a el que non entrase ao trapo. A crispación pola súa banda xurdiu despois de que, segundo conta, o goberno local convocase un pleno ordinario tras sete meses sen facelo e sen facilitar información á oposición para facer o seu labor fiscalizadora. Afirma que actualmente hai unha investigación en marcha por varias denuncias de empregados municipais e o alcalde non responde as súas preguntas nos plenos. «Ca denuncia non teño ningún problema, que me chamen para declarar, isto é de nenos de recreo», defendeu. El non tomará ningunha medida xudicial. 

O exalcalde popular estivo a cargo do Concello desde o 2003 ata o 2011. Foi condenado a oito anos e medio de inhabilitación por prevaricar. Promovera a construción dun pavillón xunto ao mosteiro de Melón, sen respectar a protección urbanística. Non puido exercer en política desde o 2012 ata o 2021. Nas últimas eleccións municipais volveu liderar a candidatura local do PP. Mentres, colleu a substitución da alcaldía a súa muller, Cristina Francisco, que este ano foi condenada a inhabilitación e multada por desobedecer á xustiza. 

---

---

---