O adestrador ourensán Ismael García celebra outra Superliga turca nas filas do Galatasaray

Ismael García Gómez (Ourense, 1988) engrosou o seu brillante palmarés en Turquía, como adestrador asistente do mítico Okan Buruk, a cargo dun Galatasaray que se fixo co seu vigesimocuarto título da Superliga, ao que uniu ademais o da Supercopa. Se a súa primeira aventura en Istambul estaba marcada polas urxencias, o revalidar o cetro nacional fronte a un reforzado Fenerbahce converteuse nun desafío que ao cabo lle brinda outro trofeo para as súas vitrinas.

«A tempada obviamente é un éxito e vimos de celebrar o novo título de liga, aproveitando tamén para festexar o da Supercopa turca, que gañaramos varios meses antes. Foi unha tempada moi completa con dous títulos, aínda que é certo que nos quedamos coa sensación de que puidemos facer un pouco máis na competición internacional. Sobre todo nese último partido en Copenhague, que nos tivese permitido pasar a fase de grupos na liga de Campións ou se superásemos algunha rolda máis en Liga Europa», resume o estratego ourensán. Antes da súa experiencia turca, estivera en Inglaterra, Italia e ata nunha escola do Real Madrid en Singapura, entre outros traballos con adestradores como Borja Jiménez ou José Luis Oltra.

Como bo deportista, Ismael non deixou pasar a oportunidade de resaltar os efectos que tivo a rivalidade co seu eterno rival para acadar as cotas que marcou o Galatasaray ao longo deste curso: «No torneo regular só podemos felicitar a un Fenerbahce que foi un grande rival. Superou o máximo rexistro de puntos do torneo, que estaba en 96, pero claro, nós fixemos 102, mellorando esa marca histórica. Batemos ademais outras barreiras como a de vitorias consecutivas, 17; o máximo número de partidos sen que Muslera encaixase gol, 17 tamén, ademais do maior número de vitorias consecutivas na casa, puntos como visitante ou ningún máis. E, a pesar de todo isto, gañamos a liga no último partido. Foi unha grande tempada dos dous e unha competitividade preciosa».

Na liga otomá coincidiu cun directivo galego, como Francis Cagigao e tamén co lateral Angeliño, que en xaneiro deu por concluída a súa cesión para rematar a campaña na Roma. No horizonte próximo, García Gómez concéntrase en desconectar da tensión habitual e rendibilizar un asueto que lograron prolongar co maior nivel exhibido polos equipos turcos en xeral: «Agora toca gozar. As celebracións foron espectaculares. O que move este club en Istambul e en todo Turquía a nivel do Real Madrid e outros equipos dese calibre no resto das mellores ligas de Europa. É necesario descansar ben, porque non se pode esquecer que esta tempada foi moi longa. Comezamos a competir en partidos oficiais o pasado xullo. Este ano, en cambio, a liga turca sumou máis puntos UEFA e o campión salta tres roldas de Liga de Campións, así que iso nos permite empezar un pouco máis tarde. No meu caso, estarei uns días máis en Istambul e despois algunha viaxe por vacacións, pero imaxínome que na segunda quincena de xuño poderei estar por Ourense durante algúns días».

---

---

---