O Parque Tecnolóxico aproveitará a instalación da Aula Newton Galicia na súa sede para desenvolver as actividades programadas para xullo
16 may 2024 . Actualizado á 05:00 h.O Parque Tecnolóxico de Galicia (Tecnópole) abriu o prazo para anotarse ao seu campamento de verán destinado a participantes de entre 12 e 18 anos. O prazo de inscrición remata a finais de maio, aínda que é recomendable facelo canto antes xa que as prazas son limitadas e poden esgotarse. En concreto haberá 80 prazas repartidas en dúas quendas (do 1 ao 5 e do 8 ao 12 de xullo), de 40 cada un. Debido ao éxito do módulo «Voamos con números: unha aventura aérea» durante o curso escolar a Tecnópole decidiu que o campamento se desenvolverá na Aula Newton Galicia.
Aproveitando os simuladores de voo e o material instalado nesa aula, o campamento co que a Tecnópole quere seguir motivando as vocacións científicas e tecnolóxicas, terá este ano un enfoque práctico e experimental. Haberá actividades que permitirán aos participantes introducirse nos conceptos básicos da aviónica e a electrónica necesarios para o desenvolvemento de proxectos aeroespaciais. Aprenderán a pilotar utilizando eses simuladores profesionais e a crear un plan de voo. Tamén se iniciarán na montaxe e manexo de drons, na programación de placas electrónicas e na creación de prototipos mediante impresión 3D. O custo do campamento é de 150 euros e nel van incluídos, ademas das actividades e os materiais, o transporte desde varios puntos da cidade de Ourense, a comida e o acceso diario ás piscinas do parque tecnolóxico.