Os escolares enchen Galiciencia de inventos para coidar das persoas e o planeta

A apertura da edición número 19 de Galiciencia, a maior feira científica de Galicia, deixou claro cales son as dúas preocupacións maioritarias da nova xeración de galegos: o coidado das persoas e a protección do medio ambiente. Nesas dúas direccións van a maioría dos 99 proxectos que este ano participan na cita que organiza o Parque Tecnolóxico de Galicia (Tecnópole) coa colaboración coa Consellería de Economía e Industria e a Fundación Española para a Ciencia e a Tecnoloxía do Ministerio de Ciencia, Innovación e Universidades.

Os estudantes de 32 centros educativos de toda Galicia estiveron investigando e traballando durante os últimos meses en temas moi diversos para presentar conclusións. Ningunhas benefician directamente aos ecosistemas, outras presentan solucións tecnolóxicas a problemas cotiáns co obxectivo de mellorar a calidade de vida dos cidadáns. Un exemplo disto último son unha caixa automatizada que facilita a administración de medicamentos, unhas lentes de realidade virtual para que persoas xordas ou con problemas de audición poidan sentir a música, ou o deseño dun método para detectar trastorno de déficit de atención e hiperactividade (TDAH) nas aulas. Hai mesmo un peluche especialmente ideado para acougar loa ataques de ansiedade e un chaleco para ciclistas capaz de previr accidentes.

Un percorrido por esta feira científica na que participan desde alumnos de educación primaria ata estudantes de FP e bacharelato, permite tamén coñecer un sistema de refrixerado para trasladar órganos doados aos hospitais onde serán trasplantados e outro para obter enerxía limpa aproveitando a auga de choiva. Hai un dron autosuficiente orientado a detectar conatos de incendios, un sistema intelixente para o coidado de plantas e ata unha axenda escolar dixital. Hai ademais investigacións sobre bebidas isotónicas, aves nocturnas do Courel, o cultivo de cogomelos con propiedades saudables en troncos de eucaliptos ou a elaboración de fungicidas a base de ortigas. E é que os alumnos traballaron en campos moi diversos para preparar a súa participación en Galiciencia, desde a agricultura ou a bioloxía á física ou a robótica.

A convocatoria da edición deste ano tiña á madeira como protagonista e un bo número de equipos centráronse neste material sostible, renovable e biodegradable e en explorar as súas posibles aplicacións. A feira mostra desde unha eco-casa, unha máquina recreativa e un piano xigante de chan fabricados con esta materia prima ata un adhesivo deseñado especificamente para traballar con este produto natural. Tamén hai unha investigación que analizou distintos tipos de leña para determinar cal sería a máis sostible para utilizar como fonte calorífica.

Pero Galiciencia non é só unha feira para visitar os postos nos que se expoñen e explican os inventos ou investigacións que sustentan os case cen proxectos seleccionados para a final do concurso. Hai moitas outras actividades de carácter lúdico que se van a desenvolver ata o venres das que se prevé que gocen 5.400 participantes. Entre elas, hai talleres nos que se mostran as infinitas posibilidades da madeira, desde a creación de cúpulas e outras estruturas construtivas ata chapeus e obras de arte.

---

---

---