O Arenteiro remonta en Tarazona cun dobrete de Christian Santos (1-2)

O Club Deportivo Arenteiro acadou os 39 puntos con once xornadas por diante, tras remontar no feudo do Tarazona e afastarse un pouco máis dos problemas do descenso. Para iso, tivo que sobreporse ao tanto dos locais, que campeó ao descanso, e darlle a volta a un tenteador que decidiu o venezolano Christian Santos con dúas espectaculares dianas: 1-2.

Comezou propondo máis unha escuadra verde que intimidou cunha diagonal de Pibe, ata armar a súa prodixiosa zurda e sacarse un trallazo que lamió o traveseiro. Os de Javi Rey eran ademais sólidos atrás e só concederon dous disparos afastados de Andreu Guiu, que atallou sen problemas Diego García. Neses primeiros compases, Pibe volveu intentalo noutro chute que se lle escapou por arriba e Romay dispuxo da máis clara. Foi tras unha recuperación de Christian Santos, quen deixou só ao de Malpica, freado pola parada co pé de Salvi Carrasco no un a un.

A partir de aí, os aragoneses crecéronse na réplica e tivo que aparecer Diego García e os seus reflexos para repeler o cabezazo de socato de Dieste, xa no ecuador do período inicial. Aínda replicou Álvaro Ramón para os visitantes, selando unha deixada de Romay cun pepinazo que desviou en última instancia o central Manu Pedre.

Eran, de todos os xeitos, minutos de crecemento dos locais, cada vez máis habituais preto da meta forasteira. Liberto rematou desviado un rexeite en curto dos verdes e, a continuación, adiantáronse nunha estratexia desde a esquina. Álex Gil buscou o primeiro pau e o lateral Borja San Emeterio gañou a partida no xogo aéreo, cabeceando ao fondo da rede. Cos carballiñeses tocados, Trilles estivo a piques de repetir a acción, pero esa vez o croque non colleu portería. A primeira metade facíaselle longa a un forasteiro que sobreviviu con outra acción felina de Diego, a remate de Cubillas.

O paso polos vestiarios deulle aire a un Arenteiro que nivelaba de novo a contenda, de volta ao céspede do Municipal. O malo para os visitantes é que as áreas estaban de adorno e desde o seu banco optaron por dar entrada a Álex Cardero e Marino coa intención de dinamizar o seu centro do campo. Nin sequera tiveran tempo de tocar o balón, cando Luis Chacón profundou pola esquerda e o seu centro rematouno imperial Christian Santos, elevándose entre dous marcadores.

O empate picou aos aragoneses e o duelo se desbocó. Diego García enviou a córner un remate de Guiu e desviou ao traveseiro outro remate do mesmo xogador. As ansias podíanlle aos de Molo e o seu opoñente lanzaba contras realmente perigosas. Chacón marcou, pero meteuse en fóra de xogo por uns centímetros e un centro chute de Álvaro Ramón case sorprende a Salvi, pero un defensor sacou sobre a liña. Xa ao fío do último cuarto de hora, o Arenteiro cazou aos seus anfitrións nunha triangulación de manual: Esquerdo filtrou ao flanco zurdo, onde Álvaro Ramón centrou aos dominios do punta e Christian Santos rouboulle a carteira aos centrais para rematar por abaixo. Inapelable.

Tocaba defender a renda ata o final, aínda que Christian estivo a punto anotarse se un triplete ao contragolpe, pero chegou canso e tras o pase de Iván Ramos, enviou ao corpo de Salvi. Os discípulos de Javi Rey suxeitaron ben o ataque deslavazado e con présas dos seus adversarios, que mesmo atacaron en superioridade numérica tras o golpe que recibiu Javi Moreno no alongue do enfrontamento. Só un desviado chute de Cubillas e o remate de cabeza de Ballo que atrapou Diego García foron opcións serias, que non abondaron para impedir o triunfo dun Arenteiro cada vez máis preto do seu obxectivo.

---

---

---