O COB bota pola borda un partido que tiña encarrilado en Burgos (85-80)

O Club Ourense Baloncesto segue sendo feble fose. Aínda que dominou o partido na cancha do Tizona Burgos durante os tres primeiros cuartos, no último non foi capaz de pechar unha vitoria que parecía cantada e quedou ao cabo en terras castelás: 85-80.

Comezou o duelo no Plantío cos ourensáns aceptando o desafío que adoita propor Diego Ocampo, cun baloncesto de alto ritmo e esixencia física. Á iniciativa local contestou Mindaugas Kacinas con dous triplos para guiar ao seu equipo a un 9-13. Non era o día dos burgaleses no lanzamento exterior, pero aínda así apertaron en defensa e con ata sete xogadores anotando para pechar o cuarto cun apertado 20-19.

No segundo capítulo da confrontación o COB tomou as rendas con decisión. Unha vez que Turner e Kacinas luciran a súa produción por fóra, a dupla que formaban Romaro Gill e Ivica Radic sementaba o pánico baixo ambos os taboleiros. O pivote jamaicano chegou aos dez puntos, cando o marcador sinalou un 20-26 que os visitantes marcaron como renda habitual ata o descanso. A pesar dun triplo do mozo Saint-Supery —un menor de idade cedido por Unicaja—, os anfitrións fóronse ao intermedio cunha anotación pouco habitual para eles, algarismos de 30-36 que mostraban o camiño para que os cobistas puxesen en moitos apuros ao equipo dirixido polo seu paisano.

O equilibrio de anotacións dentro-fóra dos ourensáns era outro punto a ter en conta e, a pesar da agresividade que volveron exhibir os burgaleses no regreso á pista, dous triplos consecutivos de Javi López e Justin Turner forxaban o primeiro aviso serio dos homes de Félix Alonso, acadando os dez puntos de vantaxe. Xa na recta final do cuarto, un triplo de Joe Cremo reducía a desvantaxe local a só cinco, pero outras dúas bombas de McNeilly e Kacinas baixaban o pano do terceiro acto, cun 49-58.

O factor confianza dos anfitrións personalizouno Gerard Jofresa (1 de 8 en triplos), cando se xogou outro mísil que puxo ao seu equipo a catro. Varias técnicas os casteláns coincidiron entón con bos minutos de Radic e Kacinas, que tras un canastón á media volta abría o colchón cobista a sete puntos, a pouco máis de catro minutos do final. O parcial desde entón foi de 21-10. Ver para crer. Os ourensáns cometeron erros de vulto, como a inocente antideportiva de Jawara, que facilitou a remontada local do 74-75 a 80-75, cando os de Ocampo estaban lanzados polos triplos dun certeiro Anau Parrado e de Cremo. Kacinas volveu ameazar de lonxe, pero Tizona non fallou os libres. O COB apagouse.

---

---

---