A Mariano Ortega e María Pinal, docentes de talla en madeira e pintura, súmanse Iris Blanco e Masa Kazu, de moldeado e cerámica
13 oct 2023 . Actualizado á 05:00 h.A Escola de Artes e Oficios de Ourense cumpriu o pasado mércores 132 anos. Con máis dun século de vida ás súas costas, é normal que este centro público, promovido pola Deputación provincial, experimentase cambios. «Cando empezou a escola estaba dirixida a persoas que viñan do campo e que querían aprender coñecementos básicos para pórse a traballar na cidade», explica Iris Blanco. Desde fai practicamente medio século na escola impártense só disciplinas artísticas. Por ela pasaron algúns autores tan recoñecidos como Antonio Failde e Xaime Quessada. Iris, de 34 anos, encárgase de ensinar modelado e baleirado. Faio desde o curso pasado, de luns a venres de 19.00 a 21.00 horas. «Penso que a escola é un tesouro oculto en Ourense. Moita xente non a coñece pero é unha marabilla porque veñen persoas de diferentes idades e hai moita diversidade artística», afirma Iris. Decatouse de que saían as prazas, presentouse e quedou a primeira. O mesmo pasoulle ao xaponés Masakazu Shida, de 49 anos, que é o profesor de cerámica e olería. «Estou moi contenta porque xusto a disciplina que me tocou é o que máis me gusta», admite Iris, que compaxina a docencia coa súa propia produción. Fai escultura, animación en volume e ata se lanzou coa escenografía nas últimas dúas obras de Sarabela.
Masa naceu en Osaka e foise a Kioto para estudar deseño gráfico, arquitectura e merchandising. Especializouse en moda e iso foi o que lle trouxo a Ourense no 2007: un contrato nunha empresa téxtil internacional. Aquí descubriu a cerámica, e tamén o galego, e desde entón non parou de mellorar. «Teño moi boa sorte porque a alfarería está de moda. O ano pasado tiña 45 alumnos e agora somos 73», admite. No seu tempo libre produce as súas propias pezas.
Os outros dous docentes levan xa varios cursos ensinando o que saben aos alumnos da escola. Desde o 2010, Mariano Ortega, de 42 anos, imparte as clases de talla en madeira. «Gústame a docencia desde sempre e a verdade é que cando apareceu a oportunidade de optar a esta praza non o dubidei. A talla en madeira é unha disciplina preciosa, aínda que tamén é a máis tediosa e teño que dicir que cada ano se van sumando novos alumnos», afirma. Ao principio a maioría dos seus aprendices superaban os 60 anos, agora hai mesmo nenos na aula. As súas clases son de luns a venres, de 17.00 a 19.00 horas.
María Pinal ten 42 anos e desde fai doce é a profesora de debuxo e pintura da escola, a disciplina con máis demanda. «Ao principio eran menos, pero o certo é que cada ano aumenta a afluencia», di. Este curso son máis de 50. «Empezamos con grafito para ver o nivel que traen e logo imos pasando por todas as técnicas», explica. Dá clase de iniciación de 16.30 a 18.30 horas e de perfeccionamento de 19.00 a 21.00 horas.