Unha festa no parque municipal do Carballiño reuniu outra vez a afeccionados e xogadores
15 may 2023 . Actualizado á 05:00 h.O titulo da liga de Segunda Federación e o seu ascenso á categoría superior, a Copa Federación na súa fase galega e o mesmo torneo na súa versión nacional. Tres títulos que centraron a festa de clausura organizada polo Club Deportivo Arenteiro no parque municipal carballiñés. E non era para menos.
Coa vitoria no feudo da Polvoreira na xornada final, o equipo verde pechou a tempada cun brillante cartón de 21 vitorias, 10 empates e só 3 derrotas, das cales 2 contabilizáronse xa cando o primeiro posto estaba garantido.
Ao cabo foron 14 puntos de vantaxe sobre o reforzado Real Avilés, que encabezou o grupo de perseguidores e un cuarteto que pugnará por outra praza de ascenso nas eliminatorias, xunto ao Valladolid Promesas, o Compostela e o Zamora, todos eles aspirantes de notable potencial económico.
Na Copa Federación, a escuadra de Espiñedo afrontou un notable desgaste físico para superar sete eliminatorias, incluídos os duelos contra os citados Compostela e Zamora ou unha Real Unión de Irún do seguinte chanzo, ata disputar como visitante a final en Alcira. Nese momento xa dispuñan da chave para acceder á Copa do Rey, na que tamén caeu unha Primeira División como o Almería, antes de que visitase Espiñedo un Atlético de Madrid ao que obrigou a remontar cos seus mellores homes o tanto inicial que toleou á afección carballiñesa.
E nunha longa tempada que foi toda unha festa, tocaba seguir celebrando onte. Desde o fotocol coas copas gañadas, aos inchables para nenos ou a sesión vermú que reuniu no parque a boa parte dos seguidores do club, dos cales uns 300 participaron na comida organizada onda os futbolistas, cadro técnico e outros integrantes da entidade deportiva.
Se Javi Rey dirixiu desde o banco boa parte da campaña, a metade da tarde tamén se incorporaron ao festexo Fran Justo e Millán Fernández, os adestradores que marcharon ao Lugo, tras encarrilar un curso excelente.
Non faltaron os cánticos dos afeccionados que seguiron fielmente ao equipo por diversos campos, incluído o máis longo cara a terras levantinas. Futbolistas como o capitán Álex Fernández ou o andaluz Joseca son moi queridos polos seareiros do Arenteiro, pero son outros moitos os que reciben cada vez máis mostras de cariño. E tamén os que destacaron sobre xeito ao longo da tempada.
A nivel numérico, Diego García volveu anotarse un Zamora, esta vez na Segunda Federación e aderezado co penalti que lle detivo a Morata na Copa do Rey. Na outra portería, Antón Escobar tamén foi top no capítulo anotador, con 14 dianas, ás que engadiu outras tres nos torneos copeiros, incluída a que lle endosou ao Almería, no citado eliminatorio estatal. Acompañaron tamén nesa faceta realizadora dous especialistas na estratexia, como Álex Fernández, que asinou 7 goles e Pibe outros 6.
En suma, un curso de ilusión, no que un histórico do fútbol ourensán diríxese cara ao seu teito competitivo.