O PSOE constitúe o seu comité electoral en Ourense co obxectivo de gobernar a Deputación
OURENSE
Os socialistas lembran que o cambio non foi posible no 2019 «xa que se levou a cabo un pacto anti natura»
23 ene 2023 . Actualizado á 05:00 h.A comisión executiva provincial do PSOE ourensán celebrou este sábado unha reunión en Ramirás que serviu para aprobar a constitución do seu comité electoral para a cita coas urnas do próximo mes de maio. Para eses comicios, os socialistas teñen como principal obxectivo aumentar a súa representación para gobernar, esta vez si, na Deputación ourensá.
«Nas anteriores eleccións municipais o PSOE conseguiu os mellores resultados da súa historia, pero daquela non foi posible o cambio na Deputación, xa que se levou a cabo un pacto antinatura», explicou o secretario provincial dos socialistas, Rafael Rodríguez Villarino. Este avanzou, por outra banda, que o partido segue traballando na elección dos seus candidatos para os 92 municipios da provincia co obxectivo de que estes sexan os mellores posibles.