A maquilladora ourensá María Quintas aposta pola beleza natural
01 abr 2022 . Actualizado ás 05:00 h.A ourensá María Quintas di que desde nena tivo claro que o seu era o mundo da beleza e a estética. «Empecei cunha canle de YouTube aos 15 anos. Aí xa me gustaba maquillarme e peitearme», comenta. Aos 23 foise a Barcelona para formarse profesionalmente. «Estudei maquillaxe e xa fixen prácticas en distintas empresas», narra. Ao rematar regresou a casa, a Ourense, e contratárona en Sociedade Téxtil Lonia. Desde entón encárgase de maquillar ás modelos das marcas Carolina Herrera e Purificación García. «Encántame a maquillaxe artística porque ten un proceso máis creativo e contas cun equipo de fotógrafos, escenógrafos, perruqueiros... con quen falas de cal é a mellor opción. É moi interesante», conta. Pero tamén lle move a maquillaxe social e o de noivas. «As vodas son un pouco máis monótonas pero tamén son moi bonitas porque participas nun día moi importante para esas persoas», admite.
María abriu o seu propio centro de maquillaxe no 2018 pero a chegada da pandemia obrigoulle a pechalo e agora desenvolve o seu traballo desde casa, onde montou un estudo precioso, impoluto e cheo de luz. «Creo que o máis importante é coñecer perfectamente os produtos cos que traballas e tamén a personalidade e o que a persoa á que estás a maquillar quere transmitir», comenta. Ademais, María dá cursos para aprender a maquillarse e a peitearse, individuais ou en grupo, e tamén formacións para profesionais do sector. Ela admite que non se maquilla todos os días e que sempre aposta por unha cosmética na que se poña en valor a beleza natural de cada un. «É moi importante coñecer á clienta e conseguir que a maquillaxe reflicta a súa personalidade, que a faga sentir cómoda consigo mesma. O meu traballo consiste en achegar seguridade e confianza nas persoas, pero nunca a través de disfrazalas», remata.