E o día fíxose de noite. Ningún fenómeno da natureza é tan evocador como unha eclipse total. Nin tampouco ningún outro espectáculo cósmicou xerou tantas e tan diversas sensacións ao longo da historia. Medo, terror, incredulidade, asombro, curiosidade, fascinación... Ante o misterio inesperado tampouco faltaron as múltiples interpretacións que as distintas culturas intentaban ofrecer ao que descoñecían, desde dragóns, cans ou lobos xigantes que se comían o Sol a pelexas de deuses ou as máis entrañables explicacións que apuntaban a unha historia de irmandade ou de amor entre o Sol e a Lúa.
Curiosamente, as primeiras predicións do xurdimento das eclipses ofrecéronas os antigos astrónomos de Babilonia, fai uns 2.600 anos, e tamén se conta a historia dun antigo emperador chinés que mandou decapitar ao seu astrónomo real porque non soubo prognosticar a chegada da ocultación total do astro rei, aínda que desde entón seguiron moitos anos de escuridade.
Poucos fenómenos como este exemplifican tan ben a dicotomía humana entre o avance no coñecemento, o intento do ser humano de ofrecer unha explicación racional ao descoñecido e a súa persistencia na ignorancia, en aferrarse á superstición para simplificar a complexidade.
En esencia, as eclipses reflicten a contradición humana porque quizais tamén delatan a nosa vulnerabilidade. Lémbrannos o pequenos e fráxiles que somos como especie ante a inmensidade do universo.
Entón, ante a ocultación total do Sol pola Lúa o mellor quizais sexa volver deixarnos levar polas sensacións. Recrearnos nelas e reconectarnos co cosmos para gozar dunha auténtica función celestial. Será unha oportunidade única, porque aínda que crea xa vivise algo similar nunca o fixo, a non ser que se desprazou a outras zonas do planeta para observar o fenómeno. Así que considérese afortunado, porque salvo que se vaia a outro lugar, en Galicia non volverá ocorrer outra eclipse total ata o 7 de novembro do 2180.
Non improvise. Elixa ben o lugar onde contemplalo para gozalo na súa plena totalidade —non é o mesmo unha eclipse parcial cunha ocultación do 99,9% que un total—, protexer debidamente os ollos cunhas lentes homologadas e déixese levar polos sentidos. Non volverá ver nada igual na súa vida.