Arde España. Hai incendios por todas partes, avivados polo vento e alimentados polos materiais resecos por moitas horas de sol. Para que se produza un incendio necesítase un combustible (todo o que sexa susceptible de arder, especialmente maleza e restos vexetais) e un comburente (o que fai posible a combustión, é dicir, o osíxeno do aire). Ademais, inflúen tamén a temperatura ambiente (canto maior sexa, máis probables son os incendios), a humidade, o vento, etcétera.
O factor principal da loita contra o lume debe ser evitar que se inicien os incendios, porque, unha vez que comezan é difícil apagalos. Para iso é necesario retirar todo o combustible que sexa posible dos montes e do resto dos espazos vexetais, é dicir, todo o que sexa susceptible de arder. O osíxeno do aire, non o podemos manipular, así que hai que actuar sobre os combustibles. Por tanto, é necesario desenvolver un programa inicial, válido para toda España, cuxo obxectivo principal sexa eliminar, no posible, a maleza dos montes.
Xa sei que é unha tarefa inxente, que non se pode levar a cabo, na súa totalidade, a curto prazo, pero hai que iniciala canto antes no outono e inverno, incorporando ao persoal contra incendios e os colectivos que teñan relación co ambiente.
Ademais, hai que implicar a todos os cidadáns: toda persoa que suba ao monte ha de baixar cun hatillo de material combustible.