Confirmado: Wyoming prescinde dos guionistas. A partir de agora fará El intermedio cos do PP. E fará ben. Home, os guionistas de El intermedio son boísimos, pero os do PP, coa recente adquisición de mozos próximos a Vox, son máis imprevisíbeis, porque non se poñen límites éticos nin estéticos nin frenéticos. A ningún guionista de El intermedio se lle ocorrería trucar o vídeo do encontro de Margarita Robles co novo embaixador de EE.UU. e poñer en boca da ministra un «Estoy con Trump» en vez do «Estoy cómoda» que realmente dixo. Aos guionistas do PP si, e fixérono. E, aínda que o Goberno e a roxería din que unha golfada así descualifica un partido que aspira a gobernar, os asesores de Feijoo convencérono de que a trapallada é unha xenialidade e van sumar votos arreo mentres a mostren nas redes sociais. E aí seguen, erre que erre, dálle que dálle con que a ministra dixo o que toda España sabe que non dixo.
Eu penso que, posto a facer unha renovación á conta do PP, Wyoming debería prescindir de Dani Mateo —un cómico extraordinario, ben o sei— e substituílo por vídeos de Miguel Tellado, en puro bravú. Os primeiros darían arrepío e noxo, pero a audiencia afaríase axiña e esperaríaos rindo e pensando: «A ver que neurorrea verbal solta hoxe o Migueliño». E o Migueliño non fallaría nunca e superaríase sempre. Aquí cómpre aclarar que existe un tic incontrolable da chamada síndrome de Tourette, que leva a quen a padece a largar alcumes, aldraxes e frases ofensivas sen control posible. Eu coñecín dous casos. O dunha señora que vía de neno no mercado de Ferrol cando me levaba miña nai. Aquela muller ía fala que fala con outra, sempre a mesma, e de súpeto retorcía o pescozo como a nena do exorcista e berraba: «Cabrón, maricón, fillo de puta!». Ou en feminino: «Zorra, porca, gran puta!». A xente ollábaa, arrepiada, pero ela e a acompañante seguían falando coma se nada. O outro é Miguel Tellado. A min non hai quen me quite da cabeza que Tellado ten a síndrome de Tourette, pero fixo da necesidade virtude e aí está, de secretario xeral do PP e de escudeiro de Feijoo no Congreso.
A min encántanme Thais Villas, Cristina Gallego e demais mulleres de El intermedio, pero cambiaríaas todas pola concelleira de Familia y Mujer de Collado Villalba, do PP, que dimitiu despois de parar no teatro a representación dun monólogo titulado Ser mujer por faltarlle ao respecto ao público con palabras escandalosas como vagina e aborto. O xogo que esa muller podería dar como guionista dos monólogos de Wyoming é inimaxinable. Porén, o que máis me impactou esta semana foi a chorrada de Feijoo acusando ao Goberno de dicir «non á guerra» e mandar unha fragata a Chipre. Amoloume porque lle teño afecto, e pregunteime cantos incompetentes andarán a comerlle a orella a todas horas. Seguro que moitos, demasiados, e toléano.