Ao final tivo que recoller cable, pero é bastante preocupante como a información (falsa) espállase polas redes ensuciándoo todo. Ofelia, exconcursante galega de Masterchef reconvertida a influencer, que está en Dubái, publicaba esta fin de semana un vídeo nas súas redes no que instaba a deixar de pagar impostos porque, segundo o seu testemuño, a embaixada non lle daba solución —entendendo como solución ser repatriada a España—. Cambia o escenario —esta vez desde un hotel— pero este é só un capítulo máis do discursito estomagante (por cuñao e falaz) de que o Estado lle rouba aos contribuíntes o seu diñeiro, que utiliza con fins espurios que nunca rematan de citarse.
Estaría ben que antes de acender o aro de luz e porse fronte ao móbil, Ofelia (como outros moitos influencers antes dela) parásese a pensar como se financia esa embaixada á que facía un chamamento e da que pouco despois —cando efectivamente lle deron amparo como española nunha situación de conflito— dicía noutro vídeo que a facía sentir arroupada. Enténdese o medo e a inquedanza nunha situación así, pero o que non ten nin pés nin cabeza é utilizar a situación para lanzar un ataque (outro) contra o mesmo sistema de benestar ao que se está intentando recorrer. E que ademais, responde.