«Fairytale of New York» (Conto de Fadas de New York) é unha canción escrita por Jem Finer e Shane MacGowan e gravada polo grupo angloirlandés The Pogues, coa participación de Kirsty MacColl. A canción é unha balada de estilo folk que narra as fantasías de Noiteboa dun inmigrante irlandés sobre as festas pasadas mentres dorme a borracheira nunha comisaría en Nova York.
A diferenza das clásicas cancións de paz, amor e esperanza que se lanzan a miúdo nas datas do Nadal, Fairytale of New York é a historia dunha parella disfuncional que discute nas rúas de Manhattan baixo unha intensa nevada na noite dun 25 de decembro. «Prometíchesme Broadway», recrimínalle ela, logo insúltalle e dille: «Bo nadal, Deus queira que sexa a última». El intenta tranquilizala lembrándolle os bos tempos pasados, cando se bicaban nun recuncho dun bar, pero de nada vale, son soños non cumpridos.
A pesar do seu ton melancólico, a canción converteuse nun clásico do Nadal, apreciado pola súa honestidade, porque nesas festas experiméntase tanto a alegría como a tristeza; é a canción do Nadal máis reproducida no Reino Unido no século XXI. Recentemente foi gravada por Iván Ferreiro, Guadi Galego e os seus colegas músicos baixo o título Conto de fadas en Madrid.
Sempre me gustou a canción e se se achegan a calquera plataforma de vídeos verán á xente cantándoa nas rúas de Dublín con Glen Harland ou Imelda May. A chamada «canción de Nadal dos perdedores» foi interpretada no funeral de Shane MacGowan, falecido no 2023, nunha emocionante despedida á que asistiu, entre outros, o presidente irlandés Michael D. Higgins.
Lembrei a canción ao ver o ocorrido coa lotería de Nadal na vila de Villamanín, no alto Bernesga (León), onde nuns poucos días pasaron da alegría á tristeza. Un erro na xestión das participacións por parte dun grupo de mozos do pobo xerou unha batalla que arruinou os soños de todo un pobo.
Entre sospeitas de «tongo» e acusacións de estafadores, a fortuna converteuse en pesadelo. Quizais ninguén acabe borracho nunha cela en León, pero cando pasen as festas estrañarán o Nadal sen amizades rotas e quererán esquecer a sorte, ou a desgraza, de que o primeiro premio chegase ao pobo: «Coidado co que desexas porque pode chegar a cumprirse».
A pesar de todo o ocorrido é bo lembrar o pobo leonés polas magníficas paisaxes da súa contorna, polos bosques ou a gastronomía, e non por un puñado de papeletas perdidas. As cousas tardarán en volver á normalidade, pero seguro que o farán. Mentres tanto, ata a canción de Nadal dos perdedores ten palabras de consolo.
Teño unha sensación (I've got a feeling), de que este ano é para min e para ti (This year's for me and you), entón bo nadal (So happy Christmas), quérote, o meu amor (I love you baby). Feliz aninovo aos perdedores!