A sorte da flotilla solidaria que intentou chegar a Gaza acaparou a atención pública. Directos na internet, sinais de vídeo, tertulianos pontificando en tempo real... Á audiencia, aos cidadáns, interesoulles moito. E iso invita a unha reflexión: saben detectar os nosos políticos cando a opinión pública virou? No caso de Israel e Palestina teño moitas dúbidas e algunhas certezas.
É obvio que o Goberno de Netanyahu (e os dos seus antecesores) son mestres da propaganda, nas súas formas antigas e nas moi modernas. Nas antigas inclúese o lobismo. Hai figuras públicas en Madrid ou en Washington que deben favores a Tel Aviv. E o réxime cóbrallos.
As hemerotecas lembrarán aos que se burlaron dos activistas que puxeron as súas vidas en perigo para frear un masacre. Aos que relativizan un xenocidio rexeitado pola maioría dos españois. Un dato. Onte non houbo clase en moitos centros educativos de Galicia. Foi por Gaza.
O vento está a virar. Tamén nos Estados Unidos. Ata Trump sábeo (e de aí a filtración da escena da Casa Blanca con Netanyahu). Ver nas redes, nas enquisas. Publícao o New York Times. Por primeira vez desde 1998, hai máis estadounidenses que se decantan ao lado palestino no canto do israelí (cae incluso o apoio entre os republicanos). A tendencia é clara. A clásica narrativa dos sionistas xa non se sostén.