Non hai escusa. Agora ou nunca. Navantia Ferrol ten diante unha oportunidade decisiva. Por iso é necesario que o Goberno reafirme o seu inequívoco compromiso coa cidade e a súa industria e complete a modernización do noso estaleiro. Da man do Plan Industrial e Tecnolóxico para a Defensa, chegou o momento de acometer o gran proxecto que esperou a súa quenda durante unha década: o dique cuberto.
Desde que hai dez anos se trazaron as liñas estratéxicas do estaleiro do futuro, o avultado do custo, arredor de 200 millóns de euros, pesou na balanza. Quen fixemos unha defensa pechada, sen concesións, desa instalación, topámonos ata agora coa situación financeira dunha empresa que necesitaba unha carteira de pedidos sostida dabondo no tempo como para acometer o investimento con folgura.
Ese día chegou. Navantia ten en construción, non sobre o papel, as primeiras unidades dunha serie completa de fragatas. A F-111 está avanzada, púxoselle a quilla á F-112 e xa se está cortando chapa para a F-113. Coas outras dúas naves, o orzamento vaise ata os 4.500 millóns de euros, unha cifra á que acompaña, non debemos esquecelo, a de empregos directos e indirectos implicados, arredor de 9.000.
Pero hai máis. As cinco F-100, outro dos emblemas da factoría ferrolá, deben pasar de aquí ao 2030 por un proceso de modernización que tamén se acometerá en Ferrol. O custo desa actualización elévase ata os 2.000 millóns, dos que 225 empezarán a mobilizarse este ano. O mesmo proceso acometerase nos dous LPD da Armada, con posibilidades de que se faga en Ferrol. E en cuestión de semanas asinarase a orde de execución do buque loxístico que substituirá ao Patiño, un proxecto de 440 millóns no que participarán 1.800 traballadores durante catro anos.
Cada un deses datos é un argumento que suma a favor da construción dun dique cuberto. Xusto á beira de onde debe situarse, o ano que vén entrará en servizo o taller dixital de bloques. Ambas as instalacións, unidas, reafirmarán as capacidades de Navantia Ferrol como un estaleiro punteiro e, o que é tamén moi importante, farano moito máis eficiente e competitivo nun mercado mundial en plena expansión debido á situación xeopolítica.
Con carga de traballo garantida para a próxima década, e con perspectivas que convidan a ser optimistas moito máis alá, está asegurado o equilibrio económico que a empresa pública requiría para afrontar o investimento. As previsións apuntan a que o aforro de construír os barcos a resgardo podería compensar o gasto en só nove anos.
Así que chegou o momento.