En primeira fila do vodevil para a declaración da guerra arancelaria figuran J. D. Vance, Marco Louro, Pete Hegseth e Brooke Rollins, vicepresidente e secretarios de Estado, de Defensa e de Agricultura. Catro brancísimos non sen branca. Pero que culpa terán eles da súa brancura, e dos veráns nOs Hamptons, e de ser potenciais clientes da Riviera Gaza, e de querer máis. E máis. E máis. Rin, os catro, armados de caras ata os dentes. Ningún se pasou co bótox. É coma se acabasen de saír da mesma lavadora. Chega ata aquí o cheiro dos seus perfumados corpos. Rin e fan nobelos coas mans mentres Donald Trump proclama que «o mundo nos rouba» despregando un éxcel de facinorosos e exóticos lugares como Tonga, Anguía, Eswatini, Cocos, Tukelau ou a Unión Europea. Quen diría que a estes catro estean a desvalixalos. Miúdos risos. Canto máis rin, a foto faise máis rematadamente triste. E iso que Elon Musk non está.