Convertamos a devastada Gaza nunha cidade de vacacións. Erixamos unha monumental Mariño D'or na costa mediterránea de Palestina. Botemos aos seus habitantes. Que llos queden Xordania e Exipto. Así completaremos cunha limpeza étnica o xenocidio que empezou Netanyahu. O territorio será para os Estados Unidos. E «a todo o mundo encántalle a idea».
Este delirio de Trump, case sempre mentireiro, a maior parte do tempo un bravucón, sacudiu ao mundo e provocou un alude de reaccións. Será Gaz-a-Lago unha realidade? Só o tempo dirao, pero a experiencia co neoiorquino dinos que convén desconfiar. Sofre do síndrome parchís: come unha e conta vinte. Tamén sabe manexar a escena con mestría. E tecer cortinas de fume.
Mentres ametrallaba a orde mundial e o dereito internacional, entre bambalinas o seu bro Elon Musk perpetraba «un dos maiores roubos da historia», segundo un senador demócrata. Ninguén votou ao dono de Tesla, pero a súa axencia DOGE entrou como un elefante en varios departamentos federais e conseguiu acceso privilexiado a datos sensibles da administración, como os pagos do Tesouro. Que van facer con esa información? Recortar gastos superfluos? Ja. Non o dubiden, gañar diñeiro. É a única razón que impulsa aos nosos queridos oligarcas.