Galicia e os seus retos económicos
OPINIÓN
Galicia ten un bo palmarés económico: á cola das rexións españolas en renda per cápita ao comezo da transición, xunto con Andalucía ou Estremadura, agora converxe coa media de España . É un feito único e insólito.
E o que está detrás deste avance é a diversificación e base ampla da súa economía, potente peso do sector industrial e téxtil, que fan de Galicia unha rexión exportadora. Unha puxante industria TIC (informática, audiovisual…), un sector primario líder en leite e carne cunha incipiente e prometedora acuicultura, unha industria madeireira que vai máis aló da súa obtención penetrándose no taboleiro e pasta de papel, e ademais Galicia, soubo trasladar a crecemento a mellora das súas infraestruturas rompendo o seu illamento e periferia.
No 2023 Galicia situouse nas dúas revolucións industriais que marcan o futuro do planeta: as tecnoloxías da información e o cambio de modelo enerxético. Estas son as oportunidades para o ano 2024.
Con respecto ao cambio tecnolóxico, o centro desa industria está na comarca da Coruña da man de Inditex e Abanca. Esta industria TIC atópase entre as 10 primeiras do Estado e refórzase coa localización da Aesia. Universidade, Xunta, Concello e Deputación deben impulsar a Cidade das Tics para que esta industria segue aumentando o seu peso na economía de Galicia.
No novo modelo enerxético de produción de combustibles non contaminantes como o hidróxeno ou o metano, Galicia está ben situada pola súa fortaleza na enerxía eólica e estarao máis da man dos fondos europeos Next Generation, xa que, segundo os Plans de Ordenación do Espazo Marítimo Eólico, Galicia disporá na zona do cabo Prior do maior espazo na península ibérica, dous miles quilómetros cadrados, para a instalación de muíños mariños.
Os novos portos da Coruña e Ferrol, xunto coas Pontes e Meirama serán bases desa nova industria. Ademais, a recente sentenza do Tribunal Supremo despexa trabas para o despegamento. Falta agora que Galicia quede conectada á rede europea do hidróxeno verde. O impulso do corredor de transportes do atlántico reforzará todo este proxecto ao mesmo tempo que potenciará os portos galegos.
Pero preséntanse máis retos. Hai que desprenderse da idea de que Galicia é unha rexión rural; somos plenamente urbanos e hai que exporse a ordenación do territorio nesa clave, elevando a dimensión municipal cara a unha superior comarcal. Xunta e Estado deben potenciar as áreas metropolitanas motoras de Galicia, en especial A Coruña e Vigo, mellorando a súa mobilidade e infraestruturas, así como elevar a dimensión da xestión do sistema portuario unificando os cinco portos de interese xeral en dúas autoridades portuarias, como se fixo en Portugal .
Ambición, coa meta posta en converxer en riqueza xa non con España senón con Europa, evitando deste xeito a saída de poboación nova e formada cara a outras rexións e países. Os retos son enormes, pero é a única forma de loitar contra o gran problema non resolto aínda de Galicia e noroeste español: o envellecemento e estancamento poboacional.