As institucións comunitarias deron un paso histórico aprobando NextGenerationEU. Un instrumento que podería achegar a España máis de 150.000 millóns de euros nos próximos seis anos como estímulo á recuperación para impulsar a súa transformación.
Para iso, os estados membro deben presentar ante a CE un plan que contemple os investimentos e reformas para impulsar a súa transformación. España ten unha oportunidade histórica de avanzar se é capaz de deseñar, acordar e executar un verdadeiro plan de país.
Para conseguilo é imprescindible coñecer as prioridades e os proxectos estratéxicos do tecido produtivo, establecendo un diálogo construtivo cos principais sectores económicos do país. Recentemente coñecemos unha iniciativa para instar ao Goberno a aprobar un PERTE da industria naval, moi importante para Galicia. O lóxico interese de calquera sector estratéxico de verse apoiado institucionalmente para a reconversión verde e dixital fai máis que comprensible estas iniciativas de sectores e rexións.
Neste contexto, ha de darse unha coordinación e colaboración institucional adecuada entre o Estado e as comunidades autónomas. O pasado 25 de marzo a Xunta demostrou ter un plan sólido de 354 proxectos «maduros e viables» e cun presuposto de 19.698 millóns de euros.
En terceiro lugar, é preciso fraguar consensos que garantan o aval parlamentario aos citados investimentos e reformas. A iso hai que sumarlle a colaboración público-privada. España poderá recibir case catro veces máis fondos europeos que no anterior período de programación. É por iso necesaria a participación privada nesta transformación, sumando o seu esforzo ao da Administración, para o que desde EY levamos meses traballando co tecido empresarial galego.
Finalmente, á hora de executar o plan, é básico que a urxencia na xestión non poña en risco o acervo do exitoso aproveitamento dos fondos estruturais para a cohesión que demostrou España. A iso contribuíron instrumentos e institucións como o informe preceptivo e vinculante da intervención, os informes da asesoría xurídica ou os ditames do Consello de Estado. O éxito do Plan España dependerá diso. Xogamos moito e non podemos perder esta oportunidade.