Steven, un pouco de coherencia. Non se pode saír de cruzada contra Netflix e ao día seguinte fichar pola plataforma de streaming de Apple. Non o necesitas, aínda que as túas últimas películas teñan sido dramas académicos a maior gloria da historia do teu país (War Horse, A ponte dos espías, ThePost ) ou custosas superproducións que non emocionan como nos 80 (Ready Player One, Indiana Jones e o Reino da Caveira de Cristal). Tampouco porque creas erroneamente que o cine é o continente, non o contido, e ataques aos que ven longametraxes ou series na televisión, o portátil, a tablet ou mesmo no móbil. Eu era dos que pensaban que nunca podería ver unha película no teléfono e estaba equivocado. Roma merece a pena ata na pantalla do smartwatch, se iso fose posible. As boas historias atrápanche, non importa o medio, e queremos seguir vendo boas historias túas, ou de Woody Allen, ou boas interpretacións como a de Kevin Spacey en House of Cards.
A semana tecnolóxica foi pródiga en anuncios. A prema con que Google anunciou o seu novo servizo de videoxogos na nube (con moitos interrogantes: «Non hai prezo, non hai datos sobre a conexión mínima que necesitaremos para gozar en condicións de Stadia e, fóra dun par de títulos, tampouco transcendeu que xogos estarán dispoñibles no seu catálogo», detalla Carlos Pereiro en Revista Morcego) explícase pola necesidade de adiantarse á compaña da mazá, que tamén se mete nese mercado. Son dous modelos distintos, o de Apple (Arcade), vía descargas e financiado mediante subscrición, pero demostra que aí hai tanto futuro como negocio.
En Cupertino viraron do hardware aos servizos, cada vez venden menos iPhone pero facturan máis polas aplicacións, a música... De aí o seu «gran luns» no que Tim Cook se presentou como un «conseguidor» de contidos, quere que, sexa o que sexa o que vexamos, escoitemos ou leamos, fagámolo a través da súa plataforma. Un pouco raro: por que vou subscribirme a HBO a través do Apple TV no canto de facelo directamente descargando a app?
As tecnolóxicas exploran novos nichos. Richard Yu, o Steve Jobs chinés, saíu ao escenario de París coas novas lentes de Huawei, que ocultan as tripas dixitais nas súas patillas. Os wearables non dixeron a súa última palabra.