Ao de Santa Pola abondáronlle cinco minutos para desatar a festa fronte ao Arenas Club de Getxo a ritmo de dobrete
19 oct 2025 . Actualizado á 05:00 h.Pascu Alba (Santa Pola, 2000). Cabeza de cartel indiscutible dunha nova sesión vermú no campo da Malata. Con máis de 5.000 racinguistas aos que nin a franxa horaria nin os dous empates previos quitaron a fame de fútbol, veuse arriba o alacantino para desatar unha verbena na bancada do fortín da ría.
? QUE XEITO DE EMPEZAR!
— Primeira Federación Versus e-Learning (@Primeira_RFEF) October 18, 2025
?? Pascu ?? ?????? ? ????? e alegra á parroquia do @racingferrolsad ?? ?? ?????? ??????.
? @LaLigaPlus e @MovistarFutbol #RacingClubFerrolArenasClub | #PrimeraFederación | #VersusELearning pic.twitter.com/gmti4swopk
Roubou o mediapunta reconvertido a extremo na medular e púxolle bachata á súa primeira condución longa para animarse coa melodía e probar un disparo que cristalizou en gol no minuto un de xogo: «Empezar o partido dese xeito sempre vén ben, enganchas á afección e moi contento individualmente, pero tamén colectivamente por poder volver gañar na casa», valorou ao termo do partido.
Gustoulle ao de Santa Pola ver á marea verde corear o retrouso do que si, que imos ascender e decidiu desmarcarse no segundo pau para, tras un saque de banda rápido, aproveitar un centro de David Concha e entrar como un obús para acuñar o 2-0. Transcorreran menos de cinco minutos: «Oxalá todas as fins de semana poidamos ter e dar estas alegrías e na casa sempre imos intentar saír así», destacou a este respecto o atacante do Racing Club Ferrol, que non dubidou tampouco en sinalarse como responsable da diana de Sustatxa por toda a escuadra.
Cinco minutos
«Pícoa, pérdoa e corremos cara atrás. Hai que aprender e este é o camiño», admitiu o de Santa Pola que tampouco quere deixarse levar por cantos de sirena e deixa nun segundo plano a súa condición de pichichi.
«Non me poño obxectivos neste tema», determinou á vez que restou importancia ao hat trick que lle negou o traveseiro ao fío da hora de partido: «Non todo pode ser, non todo pode ser», atallou ás preguntas dos xornalistas á súa saída da Malata.
E é que, máis aló de que nun inicio explosivo de partido o de Santa Pola anotou dous xurelos que fixeron que o fortín da ría atronase a decibeis de festa patronal, Pascu participou de xeito constante no xogo.
A diana de Álvaro Ramón chegou do rexeite dun disparo seu e tamén tivo Concha o cuarto nunha segunda xogada motivada por unha finalización do ex do Arenteiro. Iso foron só algúns acordes. O eco do que foi un arranque atronador do Racing no que a Pascu non lle fixo falta moito tempo para que o vento soprase de cara por primeira vez á calor do fogar este curso. Unha rapidez que pillou a moitos aínda colocándose no seu asento e mirando o marcador con sorpresa. O de Santa Pola non agardou por ninguén. Abondáronlle cinco minutos ao animador do cotarro para amenizar o vermú. O que dura unha canción.