Opa Racing
Segue a La Voz en Google Discover

O central do Racing Álex Zalaya sofre unha rotura fibrilar, que podería mantelo de baixa entre dúas e tres semanas

La Voz FERROL

OPA RACING

LOF

O maño está afectado no bíceps femoral da súa coxa dereita e o club, que avanza que fará rehabilitación, supedita o regreso á súa evolución

15 oct 2025 . Actualizado á 17:36 h.

A picada no isquio que propiciou que o central maño Álex Zalaya solicitase o cambio na visita do Racing Club Ferrol a Tajonar para medirse a Osasuna Promersas resultou ser unha «rotura fibrilar no bíceps femoral da súa coxa dereita», segundo o parte médico oficial do club. «O futbolista someterase a tratamento de rehabilitación para, en función da súa evolución, poder reincorporarse ao grupo», apuntan desde a escuadra verde.

Así, despois de someterse ás probas médicas correspondentes, confírmase a lesión do defensor, que o xogara todo ata o momento das súas molestias e que acumula dúas dianas na liga. Unha ausencia importante para o Racing, que se medirá este sábado ao Arenas de Getxo na Malata e que a próxima xornada visitará á Celta Fortuna en Barreiro.

Fontes médicas consultadas indican que, en caso de tratarse dunha rotura moderada, o tempo estimado de recuperación oscila entre dúas e tres semanas. Só se a rotura fose grao 1, o máis leve, os tempos de recuperación poderían rebaixarse ao redor de oito ou dez días. 

 Non foi, no entanto, confirmado polo club o alcance concreto da rotura fibrilar do maño. Concretamente, este martes transcendía que o ariete do FC Barcelona Lewandowski sofre unha doenza similar na súa perna esquerda e, a pesar de que tampouco se concreta prazo de recuperación desde o club blaugrana, estímase que o polaco estará preto dun mes de baixa. 

Cabe lembrar que Chema Rodríguez, que tamén ocupa a demarcación de central, sufriu unha subluxación na súa clavícula dereita fronte ao Tondela e non formou parte da convocatoria para o duelo ante Osasuna. O retorno do internacional Edgar Pujol, convocado con República Dominicana a pasada jornafas, alivia as carencias no eixo da zaga, que liquidou Pablo López fronte ao filial rojillo co lateral cántabro Saúl García, que xa se desempeñou nese posto durante a pretemporada co Racing de Santander.