Un esquema fixo, con matices e pezas móbiles, como base para a construción do Racing de Pablo López

Desde a vitoria estival en Vilalonga ata o momento actual, o Racing Club Ferrol de Pablo López foi dando mostras do que aspira a ser. Con Gelardo, David Carballo e Álvaro Giménez como únicos tripulantes da fragata verde con experiencia previa na Malata, o «equipo en construción» do técnico coruñés foi proxectando acenos de identidade e matices a considerar desde que arrincou a preparación.

O DEBUXO

Trivote e dúas excepcións

Cunha idea clara, que quedara xa patente durante a pretemporada, o técnico está a apostar por un sistema claro no que a súa autoría e sinal persoal déixanse notar na liña de medios. Con Gorostidi como áncora do equipo nunha sorte de 1-4-1-4-1, o preparador aposta por un trivote no que Jairo Noriega —que cae a banda esquerda— e Álvaro Peña —que cae a dereita— sitúanse como mediocampistas máis adiantados en fase ofensiva. En situacións defensivas, por contra, Peña atrasa a súa posición para protexer os carrís centrais máis próximo a Gorostidi e Jairo adiántase para presionar a primeira liña de pase acompañando a Antón Escobar.

Un debuxo fiel ao que, en situacións de marcador favorable como nos partidos fronte ao Talavera e a Ponferradina, renunciou o banco do Racing en favor dunha liña de tres centrais, coa entrada de Pujol e Chema, respectivamente, para acompañar a Artetxe e Zalaya. Ademais, tanto na xornada inicial ante o Tavalera como na última disputada en Tajonar contra Osasuna Promesas, durante o transcurso do partido produciuse unha modificación na altura dos mediocentros. Un esquema máis próximo ao clásico 1-4-2-3-1, con Sergio Tejera e Gelardo formando un dobre pivote convencional na segunda parte ante o filial rojillo e Jairo máis adiantado operando como mediapunta.

os xogadores

Revolución velada

Co gardameta Miquel Parera (o único que o xogou todo ata a data), Zalaya e Gorostidi (lesionado e substituído ao descanso na última xornada) como columna vertebral, Pablo López foi introducindo pequenas alternancias de pezas dentro da súa proposta. Nos extremos, o coruñés foi xogando coas rotacións de Pascu e Dacosta no perfil esquerdo. Tampouco o carril destro estivo exento de cambios. Álvaro Juan, o propio Dacosta, David Concha ou Azael García ocuparon ese perfil no que vai de campaña.

Os laterais tampouco están exentos de rotacións, con Álvaro Ramón como o que máis minutos aglutina ata a data. A vermello directa a Migue Leal fronte ao Lugo abriu a porta a un Mardones que repetiu titularidade contra o Guadalaxara e o Ourense.

No eixo da zaga, con Zalaya como inamovible no flanco esquerdo ata a súa lesión en Tajonar, Chema García é o xogador con menor presenza. Varias lesións, a última delas unha subluxación de clavícula durante o amigable fronte ao Tondela, lastraron a súa participación. A punta de lanza, cunha única titularidade para Álvaro Giménez, véna ocupando de inicio Antón Escobar con repartición de minutos.

Na medular, Tejera e Gelardo (que xogou como último home cando o Racing quedou con nove ante o Lugo) tamén dispuxeron de minutos e, ante a sanción de Jairo, foi Pascu o que se trasladou ao corredor interior desde os carrís exteriores.

os roles

Nin titulares nin suplentes

«Non hai titulares nin suplentes, hai estados de forma e plans de partido». Esta afirmación, reiterada por Pablo López esta campaña, adquire un cariz especial nas dúas últimas xornadas. Os cambios efectuados polo preparador fronte ao Ourense e a Osasuna déronlle o aire necesario ao equipo para superar un resultado adverso e conseguir sumar, dun e de tres respectivamente.

A estes trocos programados, nos que non hai que obviar a achega de Álvaro Giménez desde o banco —con dous goles e unha asistencia— hai que sumar tamén os movementos sobrevindos. A irrupción de Mardones estivo derivada pola expulsión de Migue Leal e tamén Saúl García, cuxa demarcación natural é o lateral esquerdo, tivo que porse o mono de central no último encontro pola lesión de Zalaya. Tan só Miquel Parera, baixo paus, xogouno todo nun Racing no que ninguén pode considerarse fixo.

o banco

Tres sen estrearse

Alternancias que están a derivar en que a práctica totalidade do persoal xa gozou de minutos na liga. Só Lucas Díaz, que puido custodiar o arco fronte ao Tondela; César Fernández, que rotou en portería con Parera toda a pretemporada, e David Carballo, que se luciu anotando no Memorial Moncho Rivera, están pendentes de minutos en competición oficial e a Copa está ao caer. En definitiva, Pablo López está a empezar a trazar o como da súa folla de ruta. A base está clara e agora toca apontoar a idea a base de matices. 

---

---

---