Pablo López tan só pode contar con nove xogadores do primeiro persoal e catro xuvenís
15 jul 2025 . Actualizado á 23:49 h.Tras dous días de probas médicas, os xogadores do Racing afrontarán o mércores a súa primeira sesión de traballo da pretemporada. Un adestramento a porta pechada, programado para as dez da mañá no campo da Gándara, no que Pablo López contará coa presenza de Aitor Gelardo, David Carballo, Álex Zalaya, Antón Escobar, Pascu, Jairo Noriega, César Fernández, Álvaro Juan e Miquel Parera, nove dos doce futbolistas do primeiro equipo, á espera de que o día 21 cheguen Migue Leal, Ander Gorostidi e Álvaro Ramón, aos que o club deu unha semana máis de descanso, xa que xogaron a fase de ascenso a Segundo nos seus anteriores clubs.
Xunto con eles, tamén estarán catro dos xogadores do equipo da División de Honra de xuvenís, Rubén Piñón, Joel Tenreiro, Joel Ferreira e Antón Álvarez. Daniel González comezará a exercitarse o venres.
Será un primeiro día de adestramentos cunha dobre xornada de traballo xa que pola tarde o grupo reunirase de novo, neste caso, no ximnasio da Malata, para continuar coa súa posta a punto. Unha planificación que se repetirá o xoves.
Para o venres e sábado están previstas outras dúas novas sesións matutinas na Gándara.
O primeiro amigable, o día 26 de xullo
Agora mesmo, o Racing conta con dez xogadores de campo e dous porteiros. Dos nove xogadores, tres non chegarán ata o día 21 deste mes de xullo, xornada na que se porán a traballar co grupo.
Con todo, para o día 26 deste mes de xullo, en Vilalonga, está previsto o primeiro encontro amigable da pretemporada, no que o Racing enfrontarase ao Vilalonga, encontro previsto para as 20.00 horas no campo de San Pedro.
Aínda que haberá cinco xuvenís facendo a pretemporada co primeiro equipo, o Racing podería estar curto de efectivos para disputar este encontro, sobre todo á hora de facer cambios para non dar moitos minutos aos xogadores.
Con todo, é a situación que existe. O mercado para incorporar futbolistas estará aberto ata o día 31 de agosto, que é xusto a data do arranque da competición. Por tanto queda moito tempo para fichar a bos futbolistas. É a parte positiva da situación, a negativa é que Pablo López necesitará contar co máximo de xogadores posibles para traballar.