É un futbolista cun perfil ofensivo, que chega procedente do Arenteiro
30 jun 2025 . Actualizado á 21:02 h.Tras a renovación do xuvenil David Carballo, que sobe ao primeiro equipo e a contratación de Álex Zelaya (Ourense CF), Antón Escobar (Cultural Leonesa) e Miguel Leal (Nastic de Tarragona, Pascu é a quinta fichaxe do Racing para a próxima tempada. José Pascual Alba Pascu (Santa Pola, 2000) vestirá a próxima tempada a camiseta do Racing Club Ferrol. Con 8 goles e 6 asistencias, o futbolista non só foi un dos xogadores máis destacados do CD Arenteiro no pasado exercicio, senón tamén un dos máximos referentes do campionato en Primeira Federación.Versátil e polivalente, Pascu é un centrocampista ofensivo que pode xogar tanto de mediocentro como de mediapunta, e incluso de interior dereito. Aos seus 25 anos, acumula 91 partidos e case 7.000 minutos entre Segundo B e Primeira RFEF, a maior parte deles entre o Valencia Mestalla, ao que chegou procedente da canteira ché e no que militou durante catro tempadas; e o CD Arenteiro, onde o pasado curso coincidiu co director de fútbol racinguista, Álex Vázquez.
Entre ambas as etapas, pasou catro anos no fútbol de Países Baixos, o primeiro deles na máxima categoría, a Eredivisie, co ADO Dean Haag, e os tres seguintes co Dordrecht e o Almere City, da segunda división, a Eerste Divisie. Con este último logrou o ascenso e militou unha campaña en Primeira xusto antes de fichar polo CD Arenteiro.
Pascu, que se proclamou campión da UEFA Youth League co FC Barcelona na tempada 2017/2018, foi internacional con España sub-18, disputando catro partidos coa camiseta vermella.
O club ferroláns segue buscando reforzos no mercado futbolístico.