Gelardo: «A forma de xogar do Racing de Ferrol vai cambiar»

A chegada de Alejandro Menéndez ao banco do Racing de Ferrol abriu unha nova etapa no equipo. Todo indica que se aveciñan cambios, que o xogo do Racing vai cambiar e así o aseguran os xogadores cando arrinca a segunda semana do técnico asturiano no equipo ferrolán. «Desde a chegada de Alejandro Menéndez están a cambiar moitas cousas, aínda que aínda nos restan por diante moitos máis cousas que variar. O bo desta semana é que o partido non se disputa ata o luns, polo que será unha semana longa de traballo. Temos que ir collendo conceptos do que quere o míster e que aos poucos nos vaian saíndo as cousas», asegura Aitor Gelardo, un dos compoñentes da primeira planilla.

O xogador destaca que no vestiario a xente está ben: «Estamos contentos porque vemos que se están intentando cambiar as cousas. Ver nos adestramentos e a verdade é que todos estamos confiados e con ganas de que chegue o partido do luns contra o Levante».

Gelardo destaca que o adiamento do partido contra o Burgos veulle ben ao Racing de Ferrol: «Tivemos máis tempo para traballar a forma de xogar que quere o míster. Por iso puidemos traballar con el a metade da pasada semana e toda esta semana.Ter tempo co adestrador permitiu que a asimilación dos novos conceptos futbolísticos, non fose tan aprisa. Son moitas mensaxes, moita información e é máis difícil asimilarlle cando tes menos tempo por diante».

Á hora de falar do cambio da forma de xogar do Racing con Alejandro Menéndez, Gelardo explica que: «O traballo con Cristóbal era diferente ao que facemos agora. Alejandro busca outro tipo de xogo, que nos poida servir para saír da posición na que estamos. Son dous adestradores distintos. Alejandro quere que saiamos a presionar, ser máis atrevidos, intentar estar xuntos cando nos atopemos en bloque medio e logo, co balón, intentar ir cara a arriba canto máis rápido mellor».

Do partido contra o Levante recoñece que vai ser un encontro moi complicado:« Todos os partidos na Segunda División son difíciles, aínda que si que é verdade que o Levante agora está nun gran momento. Nós tamén temos que saír da situación na que nos atopamos. Temos que intentar facelo o mellor posible e tratar de frear a fortaleza do Levante».

Gelardo tamén falou de parón destes días: «Serviunos para traballar, pero tamén para limpar a cabeza. Viñamos dunha derrota dura contra o Racing de Santander, que nos deixou moi amolados. Si que é verdade que estes días vir  ben, mental e fisicamente».

Asume que a situación na clasificación está máis complicada cada xornada que pasa: «Cada vez está máis lonxe as prazas de salvación, aínda que temos un partido menos. Agora tócanos xogar en Levante e trataremos de sacar os tres puntos. Agardamos que con Alejandro aos poucos vaian saíndo as cousas. Nós confiamos no traballo que estamos a facer».

A nivel persoal, Gelardo asume que as lesións lle impediron render ao seu máximo nivel: «Lesioneime no peor momento, cando creo que xa empezaba a xogar mellor. Tamén me tiven que adaptar a posicións novas, xa que con Cristóbal xoguei en banda e logo na posición de mediapunta. Creo que dei un bo nivel, pero podo dar moito máis e téñome que esixir moito máis».

Destaca que no vestiario todo o mundo está activado: «Ao final chegou un adestrador novo e todo o mundo quere demostrar o seu nivel e estar nese primeiro once inicial. Iso é bo, xa que nos activa a todos, os adestramentos son diferentes, con máis intensidade e máis calidade de adestramento. E o adestramento é o reflexo do partido».

En canto ás palabras de Alejandro Menéndez no sentido de que fan faltan 31 puntos para salvarse indicou: «Persoalmente prefiro ir partido a partido e máis adiante xa se verá. O ano pasado vivín un descenso co Vilarreal B, aínda que foi algo diferente. Sabes que os partidos van pasando e se non gañas méteste abaixo. Cando estás nesta situación é cando debes ter máis paciencia, pensar máis no equipo e no club, en tratar de facer o máximo en cada adestramento todos e intentar que en cada partido se vexa unha mellora. No Vilarreal eramos un filial, con moita xente mozo, neste equipo hai xente con moita experiencia, que viviu descensos, ascensos. Esa mestura de veteranos e mozos pódenos vir ben para sacar os partidos adiante».

---

---

---