O partidazo fronte ao Valladolid deixou patente que os racinguistas teñen madeira para pelexar polas prazas do «play off» de ascenso de categoría
18 mares 2024 . Actualizado ás 20:35 h.Elxe, Huesca, Mirandés, Alcorcón e Leganés pasarán polo campo da Malata, mentres que haberá que viaxar a casa de Albacete, Amorebieta, Vilarreal B, Tenerife, Zaragoza e Andorra. Son as once finais que quedan por disputar ao Racing para que finalice a competición regular na Liga Hypermotion. Cinco partidos serán en casa e seis lonxe da Malata. Todos os partidos serán complicados, hai moito en xogo por arriba e por abaixo, aínda que a priori, os encontros fronte ao Elxe e Leganés en casa son os compromisos máis duros, o resto serán de ti a ti.
Pese á fochanca que sufriu o equipo na segunda volta da competición, os racinguistas están a só dous puntos dos postos de «play off» de ascenso de categoría. A igualdade na zona de cabeza mantense e hai moitos equipos implicados na pelexa. O Leganés, que está imparable, segue destacado na primeira posición, con 56 puntos, nove máis que os ferroláns. Con todo, entre os 53 puntos que ten o Elxe, que é o segundo clasificado e os 47 que teñen o Racing e o Elxe hai nove equipos con posibilidades de pelexar tanto por esta segunda praza de ascenso directo como polos postos 3,4,5 e 6 que son os que dan dereito a disputar o play off de ascenso á máxima categoría. Polo tanto, a situación segue aberta e o Racing é un máis na pelexa, aínda que cun calendario francamente favorable.
Credibilidade
Xa dera mostras de bo xogo no encontro fronte ao Racing de Santander, aínda que contra o Valladolid o Racing deixou claro que se quere, pode. O equipo volveu dar mostras de que ten potencial para xogar a un gran nivel.
Todos os equipos pasan pola súa fochanca e todo indica que o Racing xa superou o seu. O equipo volveu a recuperar a súa solidez defensiva, salvo por algún erro e en ataque Nico Serrano volveu deixar patente que é un futbolista diferente. O navarro, cedido no Racing polo Athletic de Bilbao, fixo o primeiro gol e asistiu no segundo tanto a Iker Losada, un toque co tacón co que deixou o balón franco a Iker Losada, que encarou e bateu ao porteiro Masip cunha precisa vaselina.
O mozo navarro, que só ten 21 anos, vai camiño de converterse na nova estrela do equipo ferrolán. É un futbolista diferente, con caneo, gol e unha gran visión de xogo. Ademais, non se esconde á hora de botar unha boa man en defensa.
Dous extremos diferentes
O Racing xogou a primeira volta con dous extremos puros como Carlos Vicente e Héber Pena e agora xoga con Pinchi e Nico Serrano, que son dous futbolistas diferentes. Non chegan á liña de fondo e buscan o centro, senón que se van máis cara a dentro, onde tratan de combinar con Iker Losada ou Álvaro Giménez. En ambos os casos sempre que poden buscan o disparo a portería. De feito, os dous estreáronse xa coa camiseta do Racing, pese ao pouco tempo que levan no equipo.
Son dous xogadores cunhas boas condicións técnicas, que manexan as dúas pernas, polo que non é doado frealos, xa que ademais teñen une enorme mobilidade no campo.