O falecemento do músico sumiu ao mundo da cultura galega nunha inesperada orfandade
23 may 2025 . Actualizado á 13:56 h.A morte este venres de Vicente Luis Sanz Muñoz, Piti Sanz, sumiu o mundo da cultura galega na máis inesperada orfandade. Nado en Andalucía, en realidade considerábase galego e foi en Lugo, a cidade onde residiu ata a súa morte, onde despuntou a súa carreira.
O guitarrista, que perdeu a vida con 59 anos, iniciouse no rock na cidade amurallada, que lle regalou algunhas das persoas que marcarían a súa carreira musical que despois se trasladou durante décadas a Santiago de Compostela.
Foi Lugo a cidade que alumou ao seu grupo máis exitoso, Os Contentos. Influenciado polo revival garage que chegaba dos Estados Unidos, Piti Sanz adiantouse a outros grupos e compuxo dous dos discos máis recoñecidos deste estilo musical cando aínda non despuntaba en España.
Tamén foi en Lugo onde afianzou a súa amizade co actor Luís Tosar, co que compartiu a banda musical Di Elas. Foi el o que lle introduciu noutra das súas paixóns e polo que foi especialmente recoñecido: a música para teatro, cine e televisión. O seu labor para dotar de banda sonora a multitude de películas, series e representacións levou a conseguir catro premios Mestre Mateos pola mellor banda sonora e música orixinal e tres María Casares. Estivo tamén nomeado nos premios Goya, aínda que non levou a figura.
O seu último proxecto, S4N7, serviulle para «loitar contra o seu ego e acabar pisándoo», como el mesmo contaba nunha entrevista en La Voz de Galicia no 2021. Neste disco en solitario Piti Sanz falou do seu descenso ao abismo e da súa recuperación, ese «levantarse» que sempre levou por bandeira. A súa inesperada morte este venres deixou conmocionado ao mundo da cultura galega, que despide con honras a un dos seus máximos expoñentes.