Dun restaurante de afumados a unha residencia; a Xunta dá un impulso a autónomos e empresarios cun programa que mobilizará 19,5 millóns
12 dic 2021 . Actualizado ás 05:00 h.Emprender é de valentes. En pandemia, de heroes. Aínda así, son moitos os que dan o paso. Levar a cabo un proxecto desexado, ser o teu propio xefe, facer realidade unha vocación. No caso de Teresa Calvo todo xurdiu de modo natural. Psicóloga de profesión, traballaba nunha residencia de maiores de Lugo e esta experiencia permitiulle darse conta de que a cidade non contaba con demasiados recursos diúrnos, «vin que non estaba moi explotado e pareceume unha oportunidade. Un centro de día é un instrumento moi bo para as persoas maiores, que cando entran nunha residencia o que máis botan de menos é o domicilio», explica esta psicóloga.
Así naceu As Calas. E fíxoo en plena pandemia, «foi terrible, tiñamos o proxecto e o momento non podía ser peor, pero aquí estamos, e ben», afirma Teresa , que se lio a manta á cabeza xunto ao seu marido. O centro comezou a funcionar en outubro do 2020 e neste primeiro proxecto empresarial contaron cunha importante axuda do programa Galicia Emprende . Foron 65.000 euros, un alivio económico «sobre todo nos tempos que corren». Estas subvencións ao emprendimiento son en ocasións o empuxón final que anima aos emprendedores, «é moi importante para pór en marcha un proxecto, que pode non parecer de gran envergadura pero que para min o é». No seu caso supuxo en torno ao 20 % do orzamento total.
O apoio aos emprendedores é unha das liñas de actuación da Xunta de Galicia que, a través do Igape, impulsa cada ano programas neste ámbito. Un dos máis destacados é precisamente o que solicitou Teresa Calvo, o Galicia Emprende , que na súa convocatoria do ano 2021 apoiará un total de 52 novas iniciativas empresariais coas que se prevé mobilizar 19,5 millóns de euros e crear ou manter máis de catrocentos postos de traballo.
Deste medio centenar de iniciativas a inmensa maioría están en Pontevedra e A Coruña, 26 e 22 respectivamente, mentres que en Lugo se aprobaron catro proxectos. As axudas rozan os quince millóns de euros, 7,5 en iniciativas da provincia de Pontevedra, 5,9 para proxectos radicados na Coruña e máis de millón e medio en Lugo. Unha das características desta resolución é que reforza proxectos de ámbitos diversos da economía galega, como o sector servizos, as políticas sociais, a hostalería, o comercio ou a investigación.
En todos os sectores
Entre as 52 iniciativas apoiadas figuran a creación dunha clínica especializada en actividades innovadoras de estética, unha empresa de instalación de fluídos, unha residencia para persoas maiores e discapacitadas ou mesmo unha nova experiencia gastronómica que consiste nun restaurante especializado en produtos afumados.
A Ricardo Ledo o emprendimiento sempre lle roldou. Era unha conversación frecuente co padriño do seu fillo. Ao final, xunto a outros dous socios, os catro deron o salto e en xaneiro do 2019 naceu Unser-Rob, de servizos técnicos de enxeñería. Dedícanse á fabricación e construción de maquinaria, na actualidade practicamente en exclusiva para o sector da automoción. «Levabamos toda a vida con ganas de probar, sempre tivemos a idea de montar algo», conta Ricardo. É certo que o momento non foi o idóneo, «montamos unha empresa en plena pandemia, mala sorte». Pero tras un ano de toma de contacto e varios meses parados durante o confinamento, o certo é que o negocio crece, «a partir de xuño foi unha tolemia, non damos feito, temos ata marzo ou abril todo cuberto». Situados no Porriño, Ricardo e os seus socios poden presumir de crear emprego. Hai xa cinco empregados e queren contratar a dous en xaneiro. Optaron a unha das convocatorias do Galicia Emprende do Igape e asegura que este tipo de programas son un incentivo máis, «anímanche a crecer por dicilo dalgunha forma. Coa axuda adquirimos licenzas de software e amoblamos a sala de reunións, o que supón unha gran axuda».
Algo similar conta Teresa , cun equipo de nove persoas e un centro de día que, a pesar de dar os seus primeiros pasos en plena crise do coronavirus, «está a funcionar moi ben, facemos un balance positivo, temos unhas características por ser novos e ter apostado pola calidade que nos deron certa vantaxe en pandemia».