Quen están detrás de Contamos, a coalición electoral de Lugo, e por que se presentan?

Quen están detrás de Contamos, o proxecto de coalición electoral no partido xudicial de Lugo, e por que se presentan? Manuel Martínez é un animal político. Deputado en Madrid polo PSOE nos 80, deputado provincial entre 1999 e 2019 e alcalde de Becerreá desde o 2007, viuse traizoado cando o seu partido se opuxo a que fose o presidente da Deputación (cría que lle tocaba tras anos duros contra Cacharro), e el á súa vez traizoounos apoiando a investidura da popular Elena Candia como presidenta. Todo conflito adoita estar larvado, pero foi naquel xuño do 2015 cando estalou unha lea no PSOE lucense do que aínda quedan feridas.

E unha das consecuencias daquel terremoto político está detrás dunha operación como a de Contamos, unha coalición de persoas, intereses e partidos que nace, abertamente, coa idea non só de gobernar ou incidir nos seus municipios, se non tamén en ser a clave no futuro goberno provincial. Martínez, expulsado do PSOE, aínda que se sente socialista pero non «sanchista», como afirma, intentouno fai catro anos co seu partido Galicia Sempre, pero naquel momento faltoulle un actor que agora si deu o paso: Claudio Garrido con Camiña Sarria.

Garrido, como Martínez (un de 1953, o outro, de 1954) son históricos do PSOE e referencias políticas na provincia, ademais de ter sido deputados provinciais que acompañaron varios mandatos a un mozo Besteiro cando pelexaban contra Cacharro. Garrido di que o seu concello se viu ninguneado por Tomei e busca con Martínez e con Contamos esa plataforma que lles permita o cambio que anhelan.

necesitan máis de 5.000 votos

«Se temos deputado, será unha persoa que terá dedicación exclusiva», sinala Garrido, que aspira a volver ser alcalde de Sarria, co que en caso de conseguilo, Martínez é o mellor situado para ser deputado (o seu fillo vai de 2 na súa lista de Becerreá) se chegan a eses 5.000 ou 5.500 votos que necesitan.

Pero para chegar a ese obxectivo, os dous ex do PSOE tiveron que buscar aliados en concellos onde houbese listas independentes. Nesa mestura hai perfís de todo tipo. O máis famosos é o de Gumersindo Rodríguez, alcalde do Páramo durante 36 anos, desde 1983 a 1991 con Coalición Galega (con apoio inicial do PSOE) e logo do PP. A súa retirada fai catro anos, pactada coa dirección do PP, saltou polo aire cando se soubo que os populares fichaban ao actual alcalde, José Luis López. Este paso do PP, con miras a ter votos na Deputación, provocou o regreso de Gumersindo.

Pouco llo pensaron Nuria Mera e Marta López Abeledo para sumarse a Contamos. Ata fai un par de meses eran a secretaria de organización e a presidenta do PSOE do Corgo, ademais de edilas, pero as discrepancias á hora de elixir o candidato local (Francisco Otero) levoulles a irse do partido. Agora, a avogada Nuria Mera lidera unha lista que podería ser chave no goberno municipal, e máis tras a marcha de Javier Vila (Cs).

Para que Contamos chegue á Deputación vai necesitar polo menos os 600 votos que fai catro anos obtivo a profesora de Filosofía Carmen González, cabeza de lista por Lugo de Galicia Sempre, e que este ano acode ás urnas xunto ao Partido Galego. Algúns dos compañeiros de viaxe de fai catro anos integráronse no PP (Agustín Galego) e outros repiten agora coa docente do Lucus Augusti.

O Partido Galego, a terceira formación de Contamos, presenta como cabeza de lista en Samos a Xosé Real, edil nos últimos oito anos con Compromiso por Galicia, e que podería ser decisivo nun municipio pequeno ao haber catro candidaturas. E outro concello pequeno, Meira, presenta ata cinco listas, entre elas a de Pablo Corbelle, o máis novo de Contamos, con 24 anos e autónomo nunha tenda de electrodomésticos da vila: «Viñeron a por min porque sabían que hai moita xente desencantada e quero facer algo por Meira, que está moi estancada».

Eleccións municipais 2023 en Lugo: consulte aquí todos os nomes das listas dos 67 concellos da provincia

suso varela

---

---

---