As obras durarán tres meses e crearase unha plataforma única para que os alumnos entren e saian con maior seguridade
25 jun 2025 . Actualizado á 13:49 h.O Colexio Rosalía de Castro beneficiarase do plan de seguridade das contornas escolares posto en marcha pola Tenencia de Alcaldía do Concello de Lugo. O tenente de Alcalde, Rubén Arroxo, anunciou na rolda de prensa posterior á xunta de goberno que se adxudicaron as obras, investindo un total de 124.078,45 euros, cos que se creará unha plataforma única na Rúa Cambria, enfronte do Arquivo Histórico Provincial, con zonas axardinadas e bancos, «creando un novo espazo de convivencia como o que podemos ver no norte da cidade, na contorna do Colexio Luís Pimentel».
O CEIP Rosalía é un dos cinco centros da cidade incluídos no programa de camiños escolares seguros «facilita a conciliación familiar, ademais de promover hábitos de vida saudables e reducir o tráfico rodado na contorna dos colexios», dijo Rubén Arroxo, quien aseguró que esta actuación complementa el proyecto «Camiño ás Aulas».
A contratación aprobada hoxe inclúe tamén a renovación da rede de abastecemento e as canalizacións de iluminación, co obxectivo de mellorar os servizos e a imaxe da contorna. As obras durarán tres meses e foron acordadas tanto co AMPA como coa dirección do colexio. Os coches que circulan por esta vía poderán seguir facéndoo, pero a unha velocidade de paso moi inferior, e nos horarios de entrada e saída do colexio, os peóns terán preferencia. Esta rúa, cando sexa semipeonil, perderá algunhas prazas de aparcadoiro.
Outros acordos
Ademais, Arroxo anunciou tamén que se aprobou a prórroga do contrato de maquetación, impresión e distribución do programa das festas de San Froilán. A empresa Producións MIC será a responsable de imprimir e distribuír os 45.000 programas e 4.000 carteis do San Froilán, así como os 500 carteis do San Froilán Miúdo.
Este contrato non supón ningún gasto para o Concello de Lugo, xa que a empresa cubrirá os custos e achegará 300 euros ao Concello mediante os espazos de publicidade no programa das festas de San Froilán. Deste xeito, o custo deste servizo será sufragado pola empresa contratista cos recursos que obteña da explotación directa da publicidade comercial contida no devandito programa de festas.
En materia de Igualdade, prorrogouse o contrato educativo contra a violencia de xénero que se imparte en colexios e institutos da cidade. En Economía, renovouse o contrato co Banco Santander para a cobranza dos tributos municipais. Son catro anos e outro catro prorrogables.
En material social, cédese ata o 2028 un local na Casa María Mariño á Asociación Venelugo para que poida realizar as súas actividades. A concelleira socialista Ana Abelleira indicou que intentan facilitar locais aos colectivos sociais da cidade, lembrando que nestes momentos o 10% da poboación do municipio son inmigrantes.