Feridas dúas persoas en Cervantes ao chocar unha furgoneta contra unha máquina quitaneves

Dúas persoas resultaron feridas este luns 1 de abril despois de producirse unha colisión frontolateral entre un camión quitaneves e unha furgoneta na estrada provincial LU-P-0702, ao seu paso polo municipio lucense de Cervantes.

Tal e como informou a Garda Civil, o sinistro produciuse á altura do quilómetro 6 desta vía provincial, que une Becerreá e Navia de Suarna, ás 10.20 horas deste luns.

Ata o lugar desprazáronse efectivos do Instituto Armado, así como membros de Protección Civil e persoal sanitario, que atendeu os condutores e únicos ocupantes dos vehículos implicados neste accidente.

Saída de vía en Baralla

Por outra banda, sobre as 13.20 horas, o servizo 112 atendeu un aviso por unha saída de vía en Baralla, na N-VI no quilómetro 469. O turismo accidentado só levaba ao condutor, que necesitou asistencia medica, pero sen feridas de gravidade xa que logrou saír polo seu propio pé do vehículo.

Accidente na A-6 en Begonte

Por outra banda, ás dúas da tarde, á altura do p.k. 511,300, da autovía A-6, no termo municipal de Begonte, produciuse un sinistro viario, consistente en saída de vía pola marxe esquerda dun turismo, resultando ferido leve o seu condutor.

---

---

---