A Deputación de Lugo inviste 600.000 euros en Antas de Ulla para mellorar o acceso ao Parque Central de Galicia
ANTAS DE ULLA
Serán máis de tres quilómetros de reforma integral da estrada desde o centro da vila ata Nugallás
23 dic 2023 . Actualizado ás 21:14 h.O presidente da Deputación de Lugo, José Tomei, anunciou un investimento de preto de 600.000 euros para a renovación integral da estrada que dá acceso ao Parque Central de Galicia, o proxecto que impulsa a institución provincial para pór en valor o centro xeográfico de Galicia, situado en Nugallás, na parroquia de San Fiz de Amarante de Antas de Ulla.
A xunta de goberno provincial aprobou a licitación das obras para anchear e mellorar a LU-P-0301, no tramo comprendido entre os puntos quilométricos 0,3 e 3,6, que son os que van desde o centro de Antas de Ulla ata o Parque Central de Galicia.
«Polo tanto, servirá para dar servizo ao alto volume de tráfico que terá cando este novo reclamo turístico polo que aposta a Deputación estea en funcionamento», explicou Tomei, quen sinalou que as obras «son fundamentais para completar este novo atractivo turístico, que se converterá nun revulsivo moi importante para a promoción económica e social do concello de Antas de Ulla, da comarca da Ulloa e do conxunto da provincia de Lugo».
Reforma integral
As obras inclúen o ensanche de varios tramos co fin de que o tránsito de vehículos en ambas as direccións sexa cómodo e seguro. Non será necesario expropiar terreos.
Logo faranse os traballos de drenaxe, colocación de tubaxes, limpeza de cunetas, pavimentación con aglomerado en quente en todo o trazado e a sinalización con marcas reflexivas brancas, ademais de renovar os sinais verticais. O prazo de execución das obras é de seis meses. Hai que lembrar que esta vía tamén une Antas con Rodeiro, na provincia de Pontevedra.
Parque Central de Galicia
O presidente da Deputación é quen impulsa a creación do Parque Central de Galicia para pór en valor o centro xeográfico da comunidade autónoma. A institución provincial xa habilitou a zona de aparcadoiro, na que investiu 250.000 euros, e tamén acometeu os traballos de acondicionamento e laboreo dos terreos nas parcelas que adquiriu para crear este gran espazo público.
Ademais, ten adxudicado por un importe de máis de 1,3 millóns o proxecto de construción do Parque, que inclúe un pórtico de entrada, unha praza e un monólito, un fornelo, un edificio multiusos, un parque infantil e fontes, ademais de iluminación, sinalización e diferente mobiliario.
O goberno provincial achega ao Concello 170.000€ para pagar débedas de anos anteriores
José Tomei e a rexedora de Antas de Ulla, Pilar García Porto, asinaron un acordo polo que a Deputación achega 170.000 euros «para axudar a pagar débedas que arrastra de gobernos anteriores». Tomei enmarca este acordo «no compromiso permanente da institución provincial de colaborar en todo o que sexa posible cos concellos no que eles necesiten para funcionar mellor e prestar un mellor servizo público aos veciños, respectando sempre a súa autonomía local».
Esta axuda permitiralle ao Concello de Antas ter máis liquidez, «pois esta situación actual impide o normal funcionamento da administración local e pon en risco novos investimentos na localidade», como sinalou a alcaldesa. García Porto expuxera hai unhas semanas a delicada situación económica do Concello, con débedas pendentes de pagamento por culpa, dixo, dunha mala xestión realizada polos gobernos anteriores