O Concello da Fonsagrada recibe unha doazón dunha céntrica leira de 1.700 metros cadrados

Unha muller con orixes na Fonsagrada pero residente en Madrid, Carmen Gómez Álvarez, cedeu ao Concello unha leira de 1.700 metros cadrados. Trátase dunha céntrica leira, preto da entrada á localidade pola estrada de Lugo (LU-530) e valorada en 200.000 euros, que o Concello deberá dedicar a usos sociais, culturais ou dotacionais. A escritura de cesión asinouse na mañá deste martes na Casa do Concello da Fonsagrada.

O alcalde, Carlos López, recoñeceu abertamente, tras ese acto, a súa satisfacción polo xesto, xa que, como asegurou con bo humor, non se produce todos os días. Os destinos que se lle poderán dar ao terreo son variados, como admitiu o rexedor. Un posible fin podería ser a construción dun recinto que albergase a Feira do Butelo, co que o Concello se aforraría o actual gasto en carpas, e os dous mercados mensuais, que se celebran en sábado. Outra utilidade sería a construción dunha piscina cuberta. De todos os xeitos, o rexedor fonsagradino afirmou que a prioridade actual é completar definitivamente os trámites do polígono industrial, cuxa construción impulsa a Deputación.

Carmen Gómez Álvarez leva moitos anos fincada en Madrid, pero non perdeu os vínculos coa súa terra de orixe. A súa relación vén da súa familia materna (a súa nai chamábase María Álvarez Teijeiro), e ela, co seu marido, comprou aos seus irmáns as partes que tiñan no soar que agora foi cedido. Carmen Gómez Álvarez recoñece que os seus recordos da Fonsagrada son entrañables, e cre que a vila ten unha riqueza natural que pode ser unha das súas bazas de futuro.

---

---

---