O internacional croata vén de xogar 20 partidos en Italia e 12 en Chipre
07 jul 2025 . Actualizado á 22:50 h.Dario Dreznjak é o elixido para reforzar a posición de á-pivote no Breogán. Complementará este posto xunto ao danés Bakary Dibba. Dreznjak, nacido en Mostar (Bosnia e Hercegovina) hai 27 anos, mide 2.04 metros e xa xogou 23 partidos coa selección absoluta de Croacia, entre outros 3 no pasado Preolímpico en 2024 xunto ao ex breoganista Toni Nakic, homólogo de posición. Promedia 6.2 puntos, 2.7 rebotes e 1.5 asistencias durante os 6 partidos xogados co combinado nacional na pasada tempada. Previamente, foi internacional en categorías de formación con Bosnia e Hercegovina, o seu país natal.
A á-pivote Dario Dreznjak xogou en tres equipos diferentes durante a pasada tempada, antes da cal xa tivo contactos co propio Breogán. Xogou 20 partidos na Leiga, máxima división italiana, entre o Napoli Basketball e o Vanoli Basket Cremona finalizando a campaña no Keravnos BC, en Chipre. Na súa experiencia en Italia, promedió 7.9 e 8.1 puntos e 3.1 e 3 rebotes por partido, respectivamente, mentres que os seus números en Chipre acadaron os 11.3 puntos, 5 rebotes e 1.3 asistencias nos 4 partidos disputados na liga regular e 8.2 puntos, 3.8 rebotes e 1 asistencias nos 8 encontros de play-off.
A mellor media anotadora da carreira de Dario Dreznjak foi na liga Adriática 2022-2023 acadando unha media de 14.6 puntos xogando no KK Zadar. Unha tempada antes tivo unha efectividade do 48.2% en triplos na liga de Croacia tamén co KK Zadar.
Segundo Tito Díaz, director deportivo do club, Dreznjak «é un bo tirador, con boa porcentaxe de triplos en toda a súa carreira, intenso e con boa capacidade para o rebote».
Hoxe día, o Breogán ten once xogadores confirmados en persoal: os bases Erik Quintela, Dominik Mavra e DeWayne Russell; os escoltas Arturs Kurucs e Francis Alonso; os aleiros Aleksandar Aranitovic e Keandre Cook; a á-pivote e aleiro Bakary Dibba; a á-pivote Dario Dreznjak; e os pivotes Jordan Sakho e Dragan Apic. Ata o momento, seis continuidades e cinco fichaxes. Para pechar o persoal falta a incorporación dun pivote, dun «cinco puro».
Dae Dae Grant
Doutra banda, o base Dae Dae Grant, xogador do Breogán durante a pasada tempada, forma parte da convocatoria dos New York Knicks, finalistas da Conferencia Este da NBA, para a NBA Summer League, a liga de Verán da NBA