A Garda Civil desmantelou a un grupo de veciños de Láncara e de Carballedo no que cada membro tiña asignada unha tarefa para cometer os delitos
06 jun 2025 . Actualizado á 16:17 h.A Garda Civil detivo aos catro integrantes dun grupo criminal especializado no roubo e furto de animais en explotacións gandeiras da provincia de Lugo. Os detidos con idades comprendidas entre os 25 e 53 anos de idade e residentes nas localidades de Láncara e Carballedo foron postos ao dispor xudicial.
Iniciouse unha investigación policial tras ter constancia dun aumento desta tipoloxía delituosa na provincia de Lugo, dando como resultado a detención dos presuntos autores, os cales tiñan unha repartición clara de funcións na súa organización.
Como se organizaban
A repartición das tarefas delituosas, sinala a Garda Civil, estaba ben delimitado: había unha persoa que situaba e informaba do lugar para desenvolver a actividade delituosa, outra persoa era encargada da loxística do grupo, achegando vivenda, leiras e vehículos para o transporte, e por ultimo estaban os membros que accedían aos recintos gandeiros para cometer as subtraccións.
Tras subtraer os animais elixidos e fracturar o seu crotal identificativo, transportábanos ata o lugar de venda ou a unha leira anexa á vivenda dun dos detidos á espera da súa venda ilícita. O radio da súa actividade delituosa roldaría principalmente a provincia de Lugo con algún feito puntual en provincia de Ourense, elixindo nalgún caso explotacións gandeiras que coñecían por ser veciños dun pobo próximo á mesma, situación que lles outorgaba información privilexiada para a comisión do roubo.
Venda
Así mesmo, constatouse o ánimo lucrativo da actividade delituosa ao vender os animais seguidamente subtraídos a outro integrante do grupo, onde lles abonaban distintas cantidades económicas dependendo do animal subtraído, facendo da actividade do grupo a súa única fonte de ingresos, xa que non se lles coñecía traballo remunerado ningún, salvo a un deles que dispuña dunha gandería.
A Garda Civil inrforma que se logrou recuperar a maior parte dos animais subtraídos, os cales foron entregados aos seus lexítimos propietarios.