A Deputación de Lugo contrata reformas en estradas de sete concellos, entre elas o cinto comarcal
LUGO
Aproban as bases para participar nos premios á excelencia turística lucense
31 may 2024 . Actualizado á 13:09 h.A xunta de goberno da Deputación de Lugo aprobou este venres o contrato de varias obras por valor de algo máis dun millón de euros para mellorar estradas de sete concellos da provincia: Friol, Outeiro de Rei, Begonte, Cospeito, Lugo, Guntín e Paradela. Entre as melloras destaca un novo tramo do Cinto Comarcal, a vía de 151 quilómetros que une varios concellos do centro lucense.
En concreto, aprobou case 700.000 euros para arranxar o cinto, a LU-P-1611, entre os quilómetros 49 e 57, desde o cruzamento a N-6 en Begonte e en dirección Friol. A execución de contrato é de tres meses, pero a empresa gañadora do concurso comprometeuse a facelo en cinco semanas desde que se asine o contrato. As obras consistirán na limpeza de cunetas, drenaxe, novo pavimento e sinalización.
A voceira do goberno provincial, a socialista Pilar García Porto, destacou que desde que José Tomé preside a Deputación, investíronse 3,3 millóns en diferentes obras de mellora do Cinto Comarcal. Ademais, volveu insistir que esta vía debería ser de competencia autonómica polas súas dimensións e conexións entre municipios.
Os outros tres contratos de estradas son para a LU-P-7102, en Cospeito.Son 92.500 euros para esta vía desde o seu inicio en Feira do Monte ata o quilómetro 1,3. A adxudicataria comprométese a facer as obras en tres semanas (ten dous meses).
A outra obra é na estrada que une Lugo con Guntín, a LU-P-2913. Son 192.000 euros para esta vía entre os quilómetros 4,3 e 8,2, de Coeses a Perlama. As obras consistirán na limpeza de cunetas, drenaxe, novo pavimento e sinalización.
E a última actuación é en Paradela, a LU-P-4202, de Pacios a Currelos, por Aldosende. Son 80.000 euros para os quilómetros 3,5 ao 5. Os traballos, que serán a limpeza de cunetas, drenaxe, novo pavimento e sinalización, teñen un mes de prazo.
Roza de estradas de 34 concellos
Por outra banda, a Deputación sacou adiante un novo contrato para rozar as vías provinciais de 34 concellos, a maioría de Terra Chá, Os Ancares, A Ulloa, A Mariña e zona sur. Son once lotes por valor de 1,2 millóns e o contrato terá unha duración de dous anos. Hai quince días adxudicáronse cinco lotes, en próximas reunións aprobaranse os oito que quedan.
Convenio con Guitiriz
Ademais, a Deputación acordou un convenio co Concello de Guitiriz polo que achegará 90.250 euros para melloras en vías e camiños de varias parroquias, entre elas Labrada, San Salvador, Buriz ou Vos Vilares. Tamén haberá melloras en puntos de luz, canalización de liñas de baixa tensión, a compra dun curta céspede ou promoción turística.
Listaxe provisional de Coñece a túa provincia
Ademais, a xunta de goberno aprobou a listaxe provisional das 80 entidades que se poderán beneficiar do programa Coñece a túa provincia. Presentáronse 310 peticións, das que 11 foron desestimadas, co que unhas 220 quedan en lista de espera. Non se fai público de momento a lista xa que se abre un período de reclamacións.
Cinco subvenciones a asociacións
Tamén e aprobaron 30.000 euros para cinco asociacións que concorreron ás axudas para entidades beneficiarias do programa de melloras de servizos comunitarios. En concreto reciben a subvención a asociación de Gaibor, de Begonte; a de Chao Villarín, de Cervantes; a comunidade de montes de Cumbraos, de Monterroso; a comunidade de montes de Serra Mirandela, de Castroverde, e Villaodriz, da Pontenova.
Aprobados os premios á excelencia turística
A xunta de goberno tamén aprobou as bases para a quinta edición dos premios á excelencia turística, coas categorías de «Lugo cambia ao turismo lucense», «Premio turismo sostible» e premios «...E para comer, Lugo á gastronomía lucense».
Poderanse presentar persoas a nivel individual, empresas, asociacións, entidades ou administracións que desenvolven iniciativas en favor do turismo e a gastronomía lucense. Un xurado, saído do Consello Provincial de Turismo, fallará os gañadores dos tres premios de cada categoría, salvo a de turismo sostible, que só será un o gañador.
Os criterios de valoración serán proxectos e iniciativas que acheguen singularidade, promoción do territorio e repercusión positiva no turismo lucense. A gala de entrega dos premios será o 27 de setembro, nun acto público coincidindo co Día Mundial do Turismo. Os gañadores recibirán un diploma e unha peza de artesanía tradicional lucense.