Este evento que se celebra en Rozas, e no que colabora a Deputación, incluirá paracaidismo, paramotor, voo acrobático, drons, ultraligeros ou un simulador de voo
31 may 2024 . Actualizado á 16:34 h.O presidente da Deputación de Lugo, José Tomé, asinou este venres no Pazo de San Marcos un acordo de colaboración co presidente do Real Aeroclub, Luis Abelleira, polo que a institución provincial achegará 10.000 euros para a celebración en Rozas dunha nova edición do Criterium Aeronáutico. Este evento aéreo, consolidado como un dos máis importantes do panorama nacional, celebrarase do 25 ao 27 de xullo
Esta cita contará un ano máis con actividades pensadas para todos os públicos, entre as que se incluirán o paracaidismo, paramotor, voo acrobático, drons, ultraligeros ou un simulador de voo. Haberá tamén un circuíto de karts, inchables, voos de exhibición e exposicións.
Un ano máis terá lugar de forma simultánea a Volta Aérea a Galicia, aberta a todos os pilotos que desexen participar. Trátase dun evento moi atractivo, que forma parte da oferta turística de Lugo e que consolida á provincia como un destino de experiencias, o que precisamente encaixa, sinalan, «co modelo de turismo de calidade e sostible que impulsa a Deputación de Lugo».
A institución provincial volve ser a Administración que fai unha achega económica maior, financiando preto do 50% desta cita.