As familias do Hospital de Día Infanto-Xuvenil de Lugo denuncian á Valedora do Pobo o desmantelamento do servizo
LUGO
O Sergas négao e explica que sucede o contrario, que hai un psicólogo máis e un segundo psiquiatra de consultas externas que apoia á unidade cando é necesario
11 ene 2024 . Actualizado ás 12:25 h.As familias cuxos fillos están nos servizos do Hospital de Día Infanto-Xuvenil (HDIJ) do HULA de Lugo cidade enviaron un escrito á Valedora do Pobo no que mostran o seu malestar polo que consideran un desmantelamento do servizo que se estaba prestando ás familias lucenses.
Indican no escrito as familias (non os profesionais do hospital), «que se están vulnerando os dereitos dos nosos fillos a recibir unha asistencia sanitaria de saúde mental digna e a recibir a atención educativa que precisan mentres están ingresados no HDIJ». Explican que os recentes cambios na unidade «hanse feito sen ter en conta as necesidades asistenciais dos nosos fillos, o que empeorou a calidade do seu tratamento e con iso a súa evolución».
O HDIJ abriu as súas portas en maio do 2022, e explican as familias que cando o fixo «xa contaba con moitas deficiencias tanto a nivel do equipo de profesionais asignados (non dotación de persoal administrativo, profesor de secundaria, e asignación de persoal facultativo a tempo parcial), como de sistemas de transporte que permitan a accesibilidade dos menores de toda a provincia».
Denuncian agravio comparativo
Sinalan as familias no escrito á Valedora que Lugo sofre un agravio comparativo con respecto a outras provincias en referencia á dotación de efectivos, relativos a servizos e persoal sanitario especializado en saúde mental infanto-xuvenil. Pero que a pesar de ditas carencias «foi unha axuda moi importante para a recuperación dos nosos fillos diagnosticados de problemas de saúde mental graves e para nós como familiares que acudiamos a grupos terapéuticos semanais que tiñan lugar no mesmo horario que o tratamento grupal dos nosos fillos».
Desde os cambios realizados indican que non se están levando a cabo os grupos de pais dos programas de trastorno mental grave e de trastornos da alimentación. Así mesmo, expoñen á Valedora do Pobo que o seguimento individualizado que realizaba a psiquiatra infanto-xuvenil tampouco é posible, «xa que esta foi desprazada a outros dispositivos, limitando a súa función en HDIJ ao axuste meramente farmacolóxico».
Plan de Saúde Mental
As familias do HDIJ consideran que deben executarse as medidas propostas pola Consellería de Sanidade no seu Plan de Saúde Mental pos covid coa posta en marcha de diversos hospitais de día en Galicia como o HDIJ de Lugo, «para cal estes deben contar coa dotación de profesionais necesaria para que nós e os nosos fillos poidamos REVISAR completar o tratamento máis adecuado, favorecendo o desenvolvemento emocional, social, educativo dos menores».
Xa que logo as familias que asinan o escrito ante a Valedora do Pobo piden que se tomen as medidas necesarias para que os menores con trastornos mentais graves ingresados no HDIJ de Lugo «teñan acceso a unha atención sanitaria digna pública de calidade, así como a continuar cos seus estudos durante a longa hospitalización (como calquera outro neno hospitalizado) sen que se vulneren desta forma os seus dereitos fundamentais, como o son o acceso á saúde e a educación».
Críticas dun pai
Noutro escrito, o pai dun mozo lamenta que se eliminou a praza de psiquiatra, «ou polo menos desaparecido do organigrama». E explica que a praza deste psiquiatra «supuña unha axuda moi importante para a recuperación dos nosos fillos diagnosticados de problemas de saúde mental graves e para os familiares que acudiamos a grupos terapéuticos semanais».
O Sergas nega que se estea desmantelando o servizo
Desde a área sanitaria de Lugo aclárase que «non se desmantelou nada». Indican que o dispositivo de Hospital de Día Infanto-Xuvenil dispón dun psiquiatra, unha enfermeira, un psicólogo clínico e unha terapeuta ocupacional. «Non se restaron efectivos», explican, para engadir que mesmo se engadiu un psicólogo máis. «Pero si se reorganizou a actividade para que estes profesionais dean apoio nunha parte da súa xornada ás consultas externas do propio dispositivo do Hospital de Día Infanto-Xuvenil», destaca o Sergas.
Desta forma, apuntan que un segundo psiquiatra que se ocupaba dos nenos en consultas externas participa do apoio cando é necesario ao hospital de día, igual que o psiquiatra do hospital de día dá apoio a consultas externas de nenos. Iso si, indican que un destes psiquiatras «está de baixa laboral desde a implementación destas modificacións».