A inmigración frea o histórico descenso da poboación de Lugo: «Están a regresar españois de Venezuela que se traen ata os seus netos»
LUGO
Residen na provincia 33.610 persoas nadas no estranxeiro, 3.311 máis que hai un ano, o que provoca un saldo positivo anual de 412 lucenses máis
13 novs 2023 . Actualizado ás 17:35 h.Aínda que de momento son cifras parciais e provisionais, a provincia de Lugo está a crecer en poboación, un feito insólito nos últimos 50 anos. Só entre o 2007 e o 2008, no final do bum económico, rexistrouse un crecemento de 386 persoas. O Instituto Nacional de Estatística (INE) publicou este martes datos provisionais de residentes e a comparativa a 1 de outubro deste ano con respecto ao 2022 guinda un dato positivo para Lugo: 412 lucenses máis. Haberá que agardar ás cifras oficiais a 1 de xaneiro, pero se se cumpre esta expectativa, o cambio de tendencia sería histórico. O motivo? A chegada e regularización de inmigrantes ou de españois que retornaron do estranxeiro.
as cifras globais
Só un caso en 50 anos. A 1 de outubro deste ano había rexistrados na provincia 324.129 persoas, fronte ás 323.717 do mesmo día do pasado ano. No 2021 eran un pouco máis, 324.375. En toda a serie histórica do INE, desde 1971, só houbo un ano no que creceu a poboación, entre o 2007 e o 2008, pero a crise financeira acabou con aquel oasis. A taxa de mortalidade próxima ás 5.000 persoas anuais, xuntoco n a natalidade moi baixa (inferior ás 2.000 nacementos) foi marcando a tendencia á baixa da poboación. Só os brotes verdes da chegada de inmigración e a caída das cifras de lucenses que se marchan ao estranxeiro han ir paliando a crise demográfica. Os últimos datos do INE consolidan o cambio.
máis estranxeiros
Subida moi notable. Para comprobar o cambio demográfico abonda sinalar que en só un ano a cifra de persoas estranxeiras que residen en Lugo creceu en 2.567, e en dous anos, 4.700. Se introducimos o factor lugar de nacemento, entre o 1 de outubro do 2022 e o pasado 1 de outubro na provincia hai 3.311 lucenses máis que naceron no estranxeiro; 6.033 en dous anos. Co cal se demostra que creceu tanto a chegada de persoas do estranxeiro como españois que regresan desde fóra.
soben todas as franxas de idade
Destacan os mozos. A comparativa do crecemento de actuais residentes en Lugo que naceron no estranxeiro sae positiva este ano en todas as franxas de idade salvo nos extremos, entre 0 e 4 anos e os de 90 ou máis anos. Son significativas, polo relevante que poden ser no futuro demográfico da provincia, como hai de medias entre 200 e 400 persoas máis en franxas de idade novas, entre os 20 e os 34 anos. Por exemplo, entre 25 e 29 anos, no 2023 hai 3.125 residentes nados no estranxeiro, fronte a 2.703 do ano 2022.
O asentamento de persoas novas na provincia debería ser positivo se se ten en conta que o 61,3 % dos residentes en Lugo ten máis de 45 anos; e deles, o 30,1 % son de 65 ou máis anos. En cambio a franxa de idade entre 0 e 19 anos apenas supón o 13,6 % do total.
a procedencia
Colombia e Venezuela. Os datos de momento son provisionais e non hai detalles específicos, pero o INE recolle os tres países con maior número de chegada de persoas do estranxeiro entre xaneiro e outubro deste ano. Os que proceden de Colombia foron 790, mentres que de Venezuela foron 370. Non significa que sexan colombianos a nacionalidade que máis se instalou, se non que proceden de Colombia, país que leva anos acollendo a venezolanos que se marcharon do seu país para iniciar desde aí unha nova vida, neste caso, España. Por outra banda, rexistráronse 420 españois que retornaron este ano. En canto aos que se marchan de Lugo cara ao estranxeiro, foron 160 españois, 80 colombianos e 50 romaneses.
os fogares
2,29 persoas. O INE tamén recolle a distribución dos lucenses por fogares, que en xeral son 140.175 na provincia. Deles, cunha persoa hai 47.929 fogares; con dous membros son 40.520; con tres persoas hai 27.210; e con catro ou máis ata 24.516. A media é de 2,29 persoas por fogar lucense. Hai dous anos era de 2,32.
«Regresan españois de Venezuela e tráense aos seus netos»
Waldir Sinisterra é un avogado de orixe colombiana asentada en Lugo desde o 2008. Polo seu despacho pasan inmigrantes ou retornados españois que buscan a regularización dos seus papeis ou iniciar os trámites para conseguir a nacionalidade española.
«Nos últimos meses están regresando moitos españois ao seu lugar de orixe despois de 30 ou 40 anos no estranxeiro, especialmente de Sudamérica», explica o avogado lucense. Sinala que o caso máis habitual é o de persoas que residiron durante anos en Venezuela e que están a regresar polas dificultades económicas do país e aproveitando que son españois: «Non veñen sos, adoitan traer a toda a súa familia, incluídos os netos, co que hai que iniciar os trámites para a residencia ou para conseguir a nacionalidade», sinala Sinisterra, o cal explicaría o incremento de poboación, «algo beneficioso para Lugo».
O fenómeno de persoas de Sudamérica que se están instalando en Lugo ten que ver polos vínculos familiares, pero hai un efecto chamada, xa que como ocorreu coa emigración galega, adoita instalarse unha persoa ou unha parella, e logo acaban chegando máis familiares ou amigos.
Sinisterra destaca que os cambios lexislativos dos últimos anos han facilitando que se poidan tramitar permisos de residencia e nacionalidades con máis rapidez que antes, cando os procesos eran máis burocráticos. «Por exemplo, flexibilizáronse as condicións laborais e agora pódese consolidar arraigamento no país grazas aos cursos de formación», explica.