Os gandeiros pagarán 3,33 euros por animal e día, 0,78 céntimos máis que ata o de agora debido, di o goberno provincial, á subida dos custos dos alimentos e materiais
26 sep 2023 . Actualizado á 19:12 h.A corporación da Deputación de Lugo aprobou a revisión das tarifas do Centro de Recría que a Deputación ten en marcha na Granxa Gayoso Castro. O goberno provincial considera que a subida é fundamental «para a viabilidade deste servizo público, unha vez que está ao 100 % da súa capacidade e tendo en conta a subida dos prezos dos alimentos e dos materiais para o coidado animal debido ás consecuencias económicas da invasión de Ucraína e da seca».
A aprobación da medida, que tivo a oposición do grupo do PP, suporá para os gandeiros da provincia 0,78 céntimos máis ao día por animal, ata os 3,33 euros. Argumentou o deputado de Recursos Sostibles, Francisco Cajoto Caserío, que se trata dunha revisión «xustificada e necesaria para garantir a viabilidade da Granxa Gayoso, que dá servizo a 63 gandeiros e gandeiras da provincia e que alimenta a un total de 2.580 cabezas de gando, que consumen un total de 7,5 toneladas de alimento ao día».
Explicou o deputado socialista que no contrato coa empresa que presta o servizo na Granxa hai contemplada unha revisión de prezos cada dous anos e que os informes técnicos da Deputación son favorables a esta revisión: «É o legal, o que procede, e actuar doutro xeito é asfixiar á concesionaria e abocar ao peche da granxa», dixo Cajoto.
Sinalou o deputado provincial que coa revisión aplicada, os gandeiros da Granxa pagan menos que nun centro privado «e reciben máis e mellores servizos, porque entre os incluídos no prezo está tamén o transporte ou a inseminación dos animais». Ademais, recalcou a importancia doutras vantaxes para os usuarios deste centro como a proximidade, en Castro de Ribeiras de Lea.
O deputado socialista puxo en valor este servizo «de excelencia, que demostra cunha ocupación do 100 % que é un éxito rotundo e que xa é unha referencia en toda España». E lamentou que a Xunta «non aporta nin aportou un só céntimo para este proxecto pioneiro, nin para a súa construción nin para o seu funcionamento», e que tampouco ofreceu axudas para paliar os efectos da guerra de Ucraína, «o que demostra que á Xunta non lle importa nada nin o rural, nin o sector primario».
Pola súa banda, a voceira do PP, Antonio Ameijide, cualificou a subida como de «brutal» e insistiu no seu argumento de que os prezos de Gayoso Castro serán a partir de agora máis elevados que os dos centros privados. Cajoto negouno, e dixo que o de Zaragoza cobra 70 máis que o lucense, tras a súa actualización aprobada en pleno.
Tomei: «Non imos a facer un só quilómetro máis de estradas»
Foi rexeitada unha moción do grupo do PP para que a Deputación siga co proxecto para construír a vía provincial LU-P-4206, entre Paradela e O Saviñao, xunto ao río Miño, e que un informe técnico de Patrimonio da Xunta no 2008 sinalou que non se podía executar.
O presidente da Deputación, o socialista José Tomé, lembrou que aquel proxecto foi rexeitado pola Xunta e xustificou que no 2023 a Deputación non siga adiante nin intente modificar o proxecto de hai 15 anos. Aproveitou para sinalar que a Deputación de Lugo non fará nin un só quilómetro novo de vía provincial e que todos os esforzos irán encamiñados á conservación da rede provincial de estradas, a máis extensa de toda España, con 4.400 quilómetros, mil máis que a segunda provincia, a de León.
«Nós levamos arranxados moitos quilómetros de estradas, pero xa lles adianto que non se van facer quilómetros novos de estradas porque agora mesmo temos a maior rede de estradas do Estado con 4.400 quilómetros e o seu mantemento é moi difícil, os recursos son limitados», dixo Tomé.
O presidente da Deputación sinala que a Xunta «debería facerse coa titularidade de vías de comunicación principais que ten agora mesmo a Deputación, pois sería a solución para poder telas en mellor estado de conservación. “Non se pode vir ao Pleno da Deputación dicindo que agora hai máis Orzamento que antes, porque non é así, é inviable atender máis quilómetros de estradas tendo menos presupostos que outras provincias porque temos menos habitantes e, polo tanto, recibimos menos, esa é a realidade».
Puxo como exemplo que o goberno galego podería facerse cargo o cinto comarcal de Lugo ou da estrada que une Xermade coAs Pontes. « A día de hoxe a Xunta ten de Orzamento 12.600 millóns de euros e atende unha rede viaria de 5.500 quilómetros, mentres que a Deputación con 100 millóns conta cunha rede de 4.400».
Tomé marca ao PP, cun ollo mirando a Madrid
O pleno provincial estivo marcado porque ao mesmo tempo que se celebraba a sesión plenaria lucense estaba a desenvolverse no Congreso o pleno de investidura de Alberto Núñez Feijoo. Por este motivo houbo constantes alusións ao que ocorría en Madrid.
Unha moción de urxencia do PP en contra dunha lei de amnistía para os dirixentes e mandos que formaron parte do referendo ilegal de Cataluña foi rexeitada por PSOE e BNG, lembrando que non se podía debater algo que aínda non ocorrera e que, ademais, debateríase ao mesmo tempo que o líder do PP se presentaba a unha investidura.
Tomé afea a Ameijide e Carmen José
Pero á vez, o presidente provincial fixo uso do seu dereito para pechar os debates das mocións e intervencións para aclarar e marcar o terreo de xogo aos deputados do PP, especialmente á voceira popular, Antonio Ameijide, e á viceportavoz, Carmen José López.
«Xa lles digo que cando falen de xeito escandaloso, farei uso do dereito que me dá a o regulamento. É un aviso, non é unha ameaza», díxolles o líder socialista, que chegou a cualificar algunhas intervencións dos dous deputados populares: «Libérese do nerviosismo no que se atopa», soltoulle a Ameijide.
Mentres que á concelleira sarriá comparouna con Macarena Olona: «Parece de Vox. Deixe ese ton ofensivo e insultante, porque se sembra, pode recibir. Modérese, témplese e fale con propiedade», espetoulle o presidente provincial a Carmen José López.
Tomé tamén lle afeou a Ameijide que usase unha gravación do móbil na que se pitaba ao vicepresidente provincial, o nacionalista Efrén Castro, polas pingueiras no Pazo dous Deportes durante a celebración da Copa Galicia de baloncesto: «Eso non vale. Non valen as cuestións telemáticas».
Debate de mocións: sanidade de novo no pleno
O PSOE e o BNG sacaron adiante unha moción socialista para que a Deputación de Lugo pida á Xunta de Galicia «que garanta a atención sanitaria dos veciños e as veciñas da provincia ante a xubilación inminente de máis de 20 médicos que prestan servizo nos centros de saúde dos concellos de Láncara, Sober, Pantón, O Páramo, Guitiriz, Castro de Rei, Samos, Monterroso, Pedrafita do Cebreiro, As Nogais, O Incio, Portomarín, Antas de Ulla, A Pontenova e Begonte».
O popular Francisco Balado díxolles aos partidos do goberno provincial «que deixen de facer o paripé de traer sempre mocións sobre a mellora da sanidade e logo no Parlamento votan en contra das leis e iniciativas que buscan precisamente mellorar a cobertura sanitaria e a atención primaria».
Por outra banda, o BNG presentou no pleno unha moción para reclamar o reforzo e estabilización do servizo de fisioterapia no centro de Monterroso, que atende tamén os veciños de Taboada, Palas de Rei, Antas de Ulla e Portomarín.
Noutra moción, socialista e co apoio do BNG, a institución provincial reclamará á Xunta que modifique o modelo de tributación do canon eólico, «pasando a fixalo por potencia en lugar de por muíño; que defina a participación dos concellos costeiros nos beneficios da eólica mariña; e que estableza que a recadación íntegra do actual canon eólico e do futuro canon da eólica mariña se destine a melloras nos concellos e nas comunidades locais afectadas pola instalación dos parques».
As residencias de maiores
E foi rexeita unha moción do PP na que se pedía que se impulse a residencia de maiores de Cervantes e estúdese situala na Escola Fogar de San Román «xa que é fundamental garantir o benestar de todas as persoas que formamos parte da sociedade pero, sobre todo, daquelas persoas que durante toda a súa vida contribuíron a garantir o benestar dos demais».
Desde o goberno provincial lembráronlle ao grupo do PP de Lugo de que a Xunta ten a competencias en materia de residencias: «Non fixeron nada polos nosos maiores, en 40 anos foron incapaces de crear unha soa praza pública en Lugo capital», díxolles o socialista Pablo Rivera. Mentres que o nacionalista Efrén Castro sinalou: «É unha moción desubicada, porque se equivocan no ámbito». Pola súa banda, o popular Jesús Núñez lembrou os atrasos que hai na construción de varias residencias provinciais que foron comprometidas, como o citado caso de Cervantes, ou a de Folgoso do Courel.