O PSOE de Lugo volverá presentar a todos os seus alcaldes, salvo Burela e a dúbida de Samos
LUGO
Alfonso Rueda intenta hoxe relanzar o PP na Fonsagrada e presentará a Daniel Vega como alcaldable en Ribadeo
11 feb 2023 . Actualizado ás 05:00 h.A dirección do PSOE na provincia de Lugo non manexa outro escenario que volver presentar como candidatos a todos os seus alcaldes, incluído o de Samos , Julio Galego. Na actualidade teñen 27 alcaldías e a intención é aproveitar o tirón de todos, incluídos aqueles onde puido haber máis dúbidas. Despois de que o rexedor de Burela anunciase que non repetía, a única dúbida que teñen agora no partido socialista é o caso de Samos.
Galego —que recibiu onte a visita da subdelegada do Goberno, Isabel Rodríguez— ao parecer non quere volver presentarse e a súa intención sería abandonar a política, se ben aínda non dicir a última palabra.
Como explicou o máximo responsable do PSOE lucense, José Tomei, na última reunión da executiva provincial, o obxectivo que se marcan é manter as 27 alcaldías actuais e conseguir algunha máis. Para o primeiro fin consideran que é necesario que volvan repetir os mesmos candidatos. Para o segundo caso confían en poder acadar a alcaldía en lugares onde fai catro anos quedaron por poucos votos, como Monterroso, Antas de Ulla e Taboada, ou mesmo loitar por recuperar algunha alcaldía perdida hai anos, como Portomarín. Nos tres últimos casos volverán repetir como candidatos Roi Rigueira, Pilar García Porto e Silvia Rodríguez.
O PSOE ten un calendario apertado. O 28 de febreiro é o límite das agrupacións locais para elixir os seus candidatos. Logo debe celebrarse un comité provincial que debería ratificar eses acordos e que deberá celebrarse antes do 11 de marzo, data na que será a reunión da executiva galega, e unha semana despois, a federal. Aínda así, ata inicios de abril hai marxe para cambios.
A loita da Deputación
O outro obxectivo dos socialistas é manter o goberno na Deputación. Precisamente o partido xudicial dos concellos antes citados, o de Chantada , será un dos campos de batalla. No PSOE creen que tería que haber unha hecatombe para perder o deputado por esta zona. O PP debería duplicar en votos ao PSOE, restarlle uns 1.600 con respecto a fai catro anos. E aínda que hai diferentes alternativas de candidatos en Chantada, confían en mellorar en Antas de Ulla, Monterroso e Taboada.
O outro partido xudicial en disputa é o de Lugo, onde as contas dos socialistas pasan porque para perder con respecto ao PP, o partido de Elena Candia debería sacar 9.000 votos máis que fai catro anos. Na ecuación dos populares entra gañar os votos que deixe Cidadáns en Lugo, O Corgo ou Outeiro de Rei (onde se presentou fai catro anos), máis a fichaxe dalgún activo (especúlase a integración do alcalde independente do Páramo) e o crecemento en Lugo cidade.
Pero nas filas socialistas consideran que o traballo na Deputación e no Concello de Lugo e a presentación de novas candidaturas nalgúns municipios van ser suficientes para conservar o poder provincial. Mesmo, valoran ben a opción de que o BNG estea a traballar para presentar máis candidaturas que fai catro anos, xa que consideran que reciben votos de persoas que noutras eleccións escollen listas do PP ou quedan na abstención. Un dos lugares onde o BNG ten pensado presentar a unha persoa con certo tirón é Portomarín.
A batalla da Fonsagrada
Pola súa banda, nas filas do PP as cousas van un pouco máis rápidas, co obxectivo de ter todos os candidatos presentados antes do 25 deste mes. Este mediodía, o presidente do PPdeG, Alfonso Rueda, presenta en Ribadeo ao alcaldable, o parlamentario Daniel Vega. E logo acudirá á Feira do Butelo da Fonsagrada, onde realizará un percorrido pola feira e a vila, acompañado polo presidente da xestora do PP local, Bernardo Neno.
No Partido Popular de Lugo caeu como un xerro de auga fría a renuncia do anterior candidato e gañador das eleccións do 2019, Josín Regueiro. Non só tiña esperanzas en volver gañar as eleccións senón que consideraba que a súa achega sería clave para gañar o único deputado do partido xudicial, decisivo nos últimos anos para gobernar a Deputación. Por este motivo, Rueda acode hoxe á Fonsagrada a relanzar o partido na comarca (mañá darase a coñecer o candidato de Ribeira de Piquín) e intentar pelexar por conseguir ese deputado crave.
Repite Javier Varela de Antas de Ulla
O PP ten aínda por decidir o futuro dalgunhas candidaturas e seguen as dúbidas na continuidade dalgún alcalde. Non a hai con respecto a Javier Varela en Antas de Ulla, que intentará volver repetir como rexedor (o é desde 1999). Na dirección provincial seguen visitando concellos e en breve anuncian a «fichaxe» dunha persoa á que levaban catro mandatos intentando presentar.
Onde seguen as dúbidas é en Sarria , onde tanto PP como PSOE sofren o desgaste interno e proba diso é que é o principal concello da provincia onde ningún dos dous ten aínda anunciado ao seu candidato.
