Luis Rodríguez Patiño oficia unha misa xunto á estrada Momán-As Pontes, xa case arranxada do todo
28 oct 2021 . Actualizado ás 18:43 h.Unha misa xunto á estrada que vai de Momán (Xermade) ás Pontes, que xa está case arranxada do todo. Se se oficiaron, en anos pasados, outras dúas para denunciar o mal estado da vía, podería pensarse que esta sería unha mostra de acción de grazas. Para Luis Rodríguez Patiño, cura de Momán e de Labrada (Guitiriz) así como doutras parroquias próximas de Aranga e de Monfero, non hai nada que agradecer. «Agradecemento? ‘Nadiña'. Os políticos están manexando o noso diñeiro», dixo este xoves, durante o acto litúrxico, no que alternou galego e castelán.
O sacerdote, cuxos puntos de vista adoitan chocar cos da xerarquía,, recoñeceu, na misa, que a reparación da vía, que discorre polo municipio xermadino e polo pontés, si era motivo de alegría e de satisfacción e que esa sensación explicaba a celebración dun acto relixioso. Ante el, xunto a varias decenas de veciños, estaban o presidente da Deputación de Lugo, José Tomei, ao que acompañaban tres membros do grupo socialista na corporación provincial (Pilar García Porto, Pablo Rivera e Roberto García, que ademais é alcalde de Xermade).
Aínda que a misa durou pouco máis de media hora, o párroco non perdeu ocasión de arremeter contra o esquecemento da Galicia rural e de comentar cuestións de actualidade. Así, lamentou que os pequenos núcleos de poboación estivesen expostos a soportar estradas deterioradas, centros médicos ameazados de peche ou escolas abandonadas. Para recalcar o seu defensa de zonas rurais, mesmo citou unha situación da súa vida persoal, que inclúe unha estancia de varios anos en Inglaterra na súa nenez. «Non queriamos marchar das zonas rurais porque tiñamos todo», dixo, lembrando tamén á súa irmá.
A mellora da estrada non só significa deixar atrás abundantes fochancas, cunetas descoidadas e firme sen apenas pintura. Para o cura, ademais, supón deixar atrás unha distancia como a que pode separar o ceo e o inferno: mentres o tramo da provincia de Lugo non se arranxou, o que pasa pola provincia da Coruña —de apenas un quilómetro e medio nun traxecto total duns once— equivalía para el ao paraíso.
De todos os xeitos, si deixou un oco para agradecer aos políticos que se acordaron da necesidade desta obra. «Alégrome de que os políticos teñan escoitado ao pobo, porque —comentou— o pobo unido...». O final da expresión chegou de varios asistentes: «Xamais será vencido». E cando a misa xa acababa, chegou tamén unha explicación de por que se celebraba un acto dese tipo: cando ao sacerdote comentóuselle que a data elixida para o oficio relixioso era o 28 de outubro, lembrou que ese era o día de san Judas Tadeo, considerado avogado das causas difíciles ou imposibles.
Tomei asegura que toda a vía estará reparada o ano próximo
O presidente da Deputación, José Tomei, asegurou, unha vez rematada a misa, que todo o tramo que discorre pola provincia de Lugo, duns nove quilómetros, estaría reparado o ano próximo. Lembrou que hai dous anos, ao tomar posesión como presidente da corporación provincial, asumira o compromiso de mellorar a estrada (LU-P-2204) e que xa había fondos previstos para a última fase.
Eses traballos, detallou Tomei, están xa en fase de licitación, cuns 300.000 euros previstos como investimento nun tramo de ao redor dun quilómetro e medio. Tamén lembrou que a idea da misa de onte fora súa, pensando que sería correcta, cos traballos xa moi preto do final, tras dous nas que urxira a mellora. «Para nós, hoxe é un día de celebración», afirmou. O presidente do organismo provincial tampouco deixou pasar a ocasión de comentar que a Deputación realiza un gran esforzo para ter a punto a súa extensa rede viaria e que o investimento é maior que a realizada pola Xunta. Agora, na estrada «hai unha seguridade que antes non había», comentou o alcalde local.
Menos xente que nas outras dúas celebracións
Unhas 40 persoas acudiron á misa deste xoves, que tivo lugar á unha da tarde. A cifra era bastante inferior á das outras dúas, promovidas polo cura para criticar o mal estado da estrada e reclamar o seu arranxo. Amador Bañobre, veciño de Momán que exerce de sancristán na parroquia, comentou cal era a causa: a misa deste xoves oficiouse nun día laborable, e as outras dúas, en domingo.